ՆԱՏՕ-ն և Վրաստանը, հետևելով ԱՄՆ-ին, որոշել են զորքերը դուրս բերել Աֆղանստանից

ՆԱՏՕ-ն սկսելու է Աֆղանստանից մինչ մայիսի 1-ը «Վճռական աջակցություն» գործողությանը մասնակցող ուժերի դուրսբերումը: Գործընթացը կտևի մի քանի ամիս և կլինի կանոնավոր ու համակարգված. ասվում է Դաշինքի հայտարարության մեջ, որը հրապարակվել է չորեքշաբթի՝ ապրիլի 14-ին: Կազմակերպությունը նշել է, որ արձագանքելու է իսլամիստական արմատական «Թալիբան» շարժման կողմից հնարավոր հարձակումներին:

Հայտարարության մեջ ասվում է, որ զորքերի դուրսբերումը նշանակում է ՆԱՏՕ-ի և Աֆղանստանի միջև հարաբերությունների նոր փուլի սկիզբ և ոչ՝  դրանց ավարտ: Դաշինքի դաշնակիցներն ու գործընկերները շարունակելու են աջակցել Աֆղանստանին, նրա ժողովրդին և կառույցներին վերջին 20 տարիների ընթացքում անվտանգության առաջխաղացման և ամրապնդման գործում։

Միևնույն ժամանակ, Աֆղանստանից զորքերը դուրս բերելու մասին է հայտարարել նաև Վրաստանը։ «ՆԱՏՕ-ն որոշում է կայացրել փուլերով ավարտել առաքելությունն Աֆղանստանում... Ըստ այդմ՝ ՆԱՏՕ-ի հետ համաձայնեցված ժամանակացույցի համաձայն, վրացական ստորաբաժանումները դուրս կգան Աֆղանստանից»,- հայտնել է երկրի վարչապետ Իրակլի Ղարիբաշվիլին:

Նշենք, որ երեկ ԱՄՆ նախագահ Ջո Բայդենը հայտնել էր ամերիկյան զորքերի դուրսբերման մասին։