Թուրքիան տեղեկացրել է ԱՄՆ–ին ու ՆԱՏՕ–ին Աֆղանստանից զորքերը դուրս բերելու մասին. The Wall Street Journal

Ըստ Wall Street Journal-ի` Թուրքիան ԱՄՆ-ին ու ՆԱՏՕ-ին ասել է, որ Աֆղանստանի մայրաքաղաք Քաբուլում գտնվող թուրքական զորքերը պատրաստվում են դուրս գալ երկրից:

Թուրքական ստորաբաժանումը, որը երկար ժամանակ ապահովում էր Քաբուլի միջազգային օդանավակայանի անվտանգությունը, հնարավոր է դուրս բերվի տարածաշրջանից: Դա կբարդացնի Աֆղանստանից ամերիկյան զորքերի դուրսբերումը: Եթե Թուրքիան որոշի դուրս գալ, արևմտյան դեսպանատները գուցե ստիպված լինեն վերանայել երկրում արդեն կրճատված դիվանագիտական կազմը պահպանելու ծրագրերը:

Միջազգային կապալառուները օդանավակայանի անվտանգության համար հնարավոր այլընտրանք են, բայց դժվար թե նրանք մնան առանց զորքերի՝ իրենց անվտանգությունն ապահովելու համար: Բացի այդ՝ ԱՄՆ-ը թալիբներին խոստացել է, որ անցյալ տարի կնքված խաղաղության համաձայնագրի շրջանակներում դուրս կբերի բոլոր կապալառուներին, ինչպես նաև զորքերը:

Գերմանիան, ինչպես նաև այլ երկրներ ԱՄՆ-ին խնդրել են հետաձգել զորքերի դուրսբերումը մինչև հուլիսի 18-ը: