Սայլը ձիերից առաջ են դրել. նա, ով պաշտոն է ստանում, հետն էլ պարգևավճար են տալիս․ Ավետիսյան

Տնտեսագետ Թադևոս Ավետիսյանը Sputnik Արմենիայի եթերում խոսել է պարգևավճարների մասին` հընթացս պատասխանելով այն հարցին, թե արդյո՞ք պարգևավճարների հետ կապված կարող են լինել կոռուպցիոն ռիսկեր, ինչի մասին բոլորովին վերջերս ակնարկեց ՀՀ երկրորդ նախագահ Ռոբերտ Քոչարյանը։
Տնտեսագետ, ՀՅԴ բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանի դիտարկմամբ`պարգևատրումների վերաբերյալ գնահատականները կարող են տարբեր լինել և ցանկացած նմանատիպ գնահատականն ունի օբյեկտիվ հիմք, որովհետև այստեղ կա իրավաչափության խնդիր։ Ըստ նրա` կան կոռուպցիայի տարբեր սահմանումներ, բայց եթե իրականում պետական բյուջեից միջոցները ծախսվում են խնդրահարույց իրավական հիմնավորմամբ, ապա դա կարող է իսկապես ստանալ տարբեր որակումներ։

Ավետիսյանի փոխանցմամբ` եթե խախտվել է վարձատրության սկզբունքը, ինչը մեր երկրում գործող օրենքի պահանջ է, և իրավական կարգավորումների հակասող հիմքով տրամադրվում են պարգևատրումներ, ապա այստեղ իմաստ չկա խոսել պարգևատրման բուն գործառույթի մասին, որովհետև պարգևավճար սովորաբար տալիս են արդյունավետ կատարողականի և որակյալ աշխատանքի համար, այլ ոչ թե նախապես հայտնի` աշխատավարձի կրկնապատիկի չափով։

Հիշեցնենք՝ երեկ՝ օգոստոսի 17-ին, վարչապետ Նիկոլ Փաշինյանն իր ելույթում նշել էր, որ ժողովուրդը պետք է ուրախանա, որ Հայաստանում կան նախարարներ, որոնք 100-300 000 դրամ պարգևավճարների կարիքն ունեն։