Եթե Ա. Բաբաջանյանը հաջողի՝ ՀՀ-ն կհայտնվի մի տեղ, որտեղ 2008 թ. Վրաստանն էր. Ա. Գրիգորյան

ՀՅԴ Հայաստանի Գերագույն մարմնի Ֆինանսների հանձնախմբի նախագահ Արմեն Գրիգորյանն իր ֆեյսբուքյան էջում գրում է.

«Չեմ ցանկանում մտնել մարդկային որակների, դրանց տեսակների, իրարից ընդգծված տարբերվող մոտեցումների և գործնական դաշտում կիրառելու խոհափիլիսոփայական թեզերի մեջ, բայց մի կարևոր շեշտադրում պետք է կատարել: Բարոյահոգեբանական վիճակի բարելավումից խոսող, օրինականության և օրինապաշտ քաղաքացու դիրքերից հանդես եկող, սկզբունքային գաղափարներ կրելու մասին բարբաջող, որակյալ քաղաքացի ներկայացող, բայց ճիշտ հակառակ կյանքով ապրող մարդը կարող է ունենալ բացառապես մեկ սկզբունք, այն է. «ավելի լավ է ձևացնել, քան այդպես մնալ ոչինչ»: Ձևացնե՛լ, ոչ թե լինել այդպիսին: Մարդկային ձևի, բայց ոչ որակների մեջ տեղավորվողը ունենում է իրեն հատուկ ընդգծված բնազդ, որը մեկ բառով կարելի է բնութագրել այսպես. «նա օգտվում է անամոթաբար»:

Արման Բաբաջանյան երևույթը որպես ասածիս ամբողջությունը գործնականում անում և արել է հետևյալը. Ամբողջ կյանքում իր լրատվական կայքով գռմռացել է գնացող եկողի վրա, հատկապես նրանց, ովքեր ազգային արժեքներ են առաջ մղել:
Այս անպատասխանատու երևույթի մասին ճշգրիտ պատկերացում կազմելու համար բերեմ մի քանի օրինակ.

Ժամանակին անամոթաբար օգտվել է և Ղ-տելեկոմ ընկերության հետ կնքել է պայմանագիր, ստացել է 10 հեռախոսահամար և մեկ մոդեմ: Վճարում չի կատարել, դատարանով գանձել են 155460 ՀՀ դրամ:

Ժամանակին անամոթաբար օգտվել է և Սիլ ինշուրանս ընկերության հետ կնքել է պայմանագիր, ստացել է ապահովագրության վկայագրեր: Վճարում չի կատարել, դատարանով գանձել են 80480 ՀՀ դրամ:

Ժամանակին անամոթաբար օգտվել է և ՀՀ ոստիկանության պետական պահպանության հետ կնքել է պայմանագիր, ստացել է ծառայություն: Վճարում չի կատարել, դատարանով փորձել են գանձել ավելի քան 3.0 միլիոն կուտակված պարտքը, բայց հայցը մերժվել է վաղեմության ժամկետի հիմնավորմամբ:

Եվ այս անամոթաբար օգտվողը այսօր պատգամավոր է, օգտվելով Լուսավոր Հայաստան կուսակցության հավաքած քվեներից և դարձել Ազգային ժողովի պատգամավոր իր 374 քվեով: ԼՀ-ից օգտվելով ներխուժել է ԱԺ, դարձել անջատված պատգամավոր՝ չհասկանալով իր ունեցած հանգամանքը, չհասկանալով ԱԺ ամբիոնի կարևորությունն ու արժեքը, ինչ ասես խոսել է: Նա լկտիաբար փորձ արեց պիտակավորել ազգային դաշտում գործող, քաղաքական կազմակերպությանը՝ ՀՅԴ-ին: Իմիջայլոց սույն երևույթի և ադրբեջանական լրատվամիջոցների ու քաղաքական ղեկավարության տեսակետն այս իմաստով համընկնում են: Այս ամենի վկայությունն է, Արման Բաբաջանյանի հայտարարության արագ արձագանքն ու տարածումը ադրբեջանական մեդիադաշտում: Ադրբեջանական ռազմաքաղաքական քարոզչության թիրախ դարձած Դաշնակցությունը այդ հանգամանքը շատ լավ հասկանում է և նորմալ է ընդունում, տարօրինակ կլիներ եթե 90-ականներին Արցախում ՀՅԴ կողմից շան ծեծ կերածները այլ վերաբերմունք ունենային ՀՅԴ հանդեպ:

Հանրության շրջանում ձևավորել է իմիտացիա, որ իբր լոյալ վերաբերմունք ունի գործող իշխանությունների հանդեպ, բայց տեսնելով, որ ինչ-ինչ հարցերում իշխանությունները սխալներ և բարդություններ ունեն, միանգամից լծվել է նոր նախաձեռնության իրականացմանը: Արդեն պարզ է, պրոցես է ուզում սկսել: Համոզված եմ, որ պրոցեսի հիմքը կլինի հակառուսական տրամադրություններ ստեղծել ՀՀ-ում, ինչի համար փող կպոկի արևմուտքից, իսկ հաջողության դեպքում Հայաստանը Արցախի հետ կարող է հայտնվել մի տեղ, որտեղ 2008 թվականին Վրաստանն էր:

«Շան տղա», «շան տղա» … Ոչ էլ մերն է …»։