Եթե տնտեսական աճ չապահովվի, հարկայինը կհայտնվի վատ վիճակում

«Մենք ասում ենք, որ տնտեսական աճ ենք ապահովելու եւ բյուջետային եկամուտներն ապահովելու ենք հիմնականում տնտեսական աճի հաշվին: Պարոն Ալավերդյանն այն միտքը տվեց, որ եթե տնտեսական աճ չապահովվի, ապա նշանակում է, որ ե’ւ հարկ վճարողները, ե’ւ հարկային մարմինները հայտնվելու են շատ վատ վիճակում»,- կառավարությունում այսօր ասաց ՊԵԿ նախագահի տեղակալ Վախթանգ Միրումյանը` անդրադառնալով այն մտահոգություններին, որ ԱԺ-ում 2014 թվականի բյուջեի նախագծի քննարկումների ժամանակ ուներ ՊԵԿ ղեկավարի տեղակալ` հարկային ծառայության պետ Արմեն Ալավերդյանը:

Ըստ Միրումյանի` եթե տնտեսական աճի հաշվին չապահովվեն եկամուտները, նշանակում է ճնշում կլինի հարկ վճարողենրի` բիզնեսի նկատմամբ:

Հարցին` իսկ վատատեսական սցենարների դեպքում բյուջեն ինչպե՞ս է ապահովվելու, Վախթանգ Միրումյանը նշեց, թե առհասարակ բյուջեն ապահովվում է երկու գործոնի հաշվին` տնտեսական աճի եւ վարչարարության կատարելագործման, որը յուրաքանչյուր տարի բյուջեում ապահովում է 0.3-0.4 տոկոսային կետ:

«Անկեղծ ասած` սա այն գումարն է, որ հարկային մարմիները պետք է ապահովեն ստվերից: Եթե տնտեսական աճի դանդաղում կա, նշանակում է, որ հարկային մարմինները պետք է շատ ավելի ջանքեր գործադրեն, որպեսզի ստվերից շատ ավելի մեծ գումարներ դուրս հանեն»,- ասաց Միրումյանը: