Վրաստանն ընդունում է, որ 2008-ին ոչ ադեկվատ է գործել

2008 թվականի օգոստոսին Ռուսաստանի հետ զինված հակամարտության ժամանակ վրացական իշխանությունները գործել են ոչ ադեկվատ. վրացական ԶԼՄ-ների հետ հանդիպման ժամանակ կարծիք է հայտնել Վրաստանի վարչապետ Բիձինա Իվանիշվիլին:

«Ես համարում եմ, որ մեր (նախկին) իշխանությունները` նախագահի (Սահակաշվիլիի) ղեկավարությամբ, գործել են այդ իրադրությանը ոչ համապատասխան` պատերազմական գործողություններ սկսելով մինչ Ռուսաստանի` սահմանն անցնելը»,- հայտարարել է Իվանիշվիլին:

Նրա կարծիքով` պատերազմից հնարավոր կլիներ խուսափել` հրավիրելով միջազգային դիտորդների, մարդկանց տարհանելով սահմանամերձ գյուղերից եւ այնտեղ բանակային ստորաբաժանումներ մտցնելով. տեղեկացնում է РБК-ն:

«Մենք մեծ ցանկություն ունենք կարգավորել հարաբերությունները Ռուսաստանի հետ, դրա համար շատ պարզ մեխանիզմներ կան, որոնք չեն վնասի մեր երկրին»,- համոզված է նա: Վարչապետն ընդգծել է, որ կարգավորումը նախկին իշխանության վրդովմունքն է առաջացնում, սակայն դա տեղի կունենա:

Ինչ վերաբերում է կորուսյալ տարածքներին, ապա, ըստ Իվանիշվիլիի, դրանք կվերադարձվեն քայլ առ քայլ: Նրա կարծիքով` Միխեիլ Սահակաշվիլիին 2008-ի իրադարձությունների կապակցությամբ հարցաքննության կանչելը չի հակասում քաղաքակրթության շրջանակներին: Ըստ Իվանիշվիլիի` Սահակաշվիլին ինքը պետք է այդ ամենին ըմբռնումով մոտենա: