Ես ամեն ինչ անելու եմ, որ ով էլ լինի պաշտպանության նախարար, անպայման հաջողի. Վիգեն Սարգսյան

ՊՆ անձնակազմը պատրաստում է մոտ տասը ժամանոց բրիֆինգ նոր նախարարի ու նոր թիմի համար. հրավիրած ասուլիսում հայտարարեց պաշտպանության նախարարի պաշտոնակատար Վիգեն Սարգսյանը:

Նա ընդգծեց, որ շատ լավ հասկանում են այն առաջնահերթությունը, որն անհրաժեշտ է ծրագրերի իրականացման համար։ «Ամեն ինչ անելու ենք, որ  պաշտպանության նախարարության նոր թիմն ու նախարարը հաջողեն»,- ասաց Սարգսյանը:

Նա հույս հայտնեց, որ ՊՆ ծրագրերը կշարունակվեն, որովհետև դրանք ներկուսակցական քաղաքական հայացքների դրսևորման արդյունք չեն եղել:

Սարգսյանի կարծիքով` որևէ մարդ, ով գոնե մեկ օր, մեկ շաբաթ, մեկ ամիս, մեկ տարի նվիրվել է երկրի պաշտպանության կազմակերպման գործին, պետք է առնվազն ոչ ադեկվատ լինի, որպեսզի չերազի, որ իր հաջորդն իրենից արդյունավետ լինի։ «Դա բացարձակ անձնական ամբիցիայի խնդիր չէ, դա մեր հասարակության, մեր երկրի, մեր պետության անվտանգության հարցն է, այդ թվում` իմ ընտանիքի, իմ երեխաների, նրանց ընկերներրի: Ես ամեն ինչ անելու եմ, որ, անկախ քաղաքական հայացքներից, ով էլ լինի պաշտպանության նախարար, անպայման հաջողի»,- հայտարարեց նա։

Վիգեն Սարգսյանը նշեց, թե չգիտի՝ ինչքանով իր խորհրդի կարիքը կլինի, բայց ինքը միշտ պատրաստ է խորհուրդ տալ։