Էրդողանն արգելել է դիմակների վաճառքը` անվճար են բաժանելու. Anadolu

Թուրքիան քայլ առ քայլ կիրառում է անհրաժեշտ միջոցառումները նոր տիպի կորոնավիրուսի տարածման դեմ պայքարում. ապրիլի 6-ի հեռուստաուղերձում ասել է երկրի նախագահ Ռեջեփ Թայիփ Էրդողանը:

Նա տեղեկացրել է քաղաքացիներին, որ իշխանությունները սկսել են բնակչությանն անհատույց կերպով բժշկական դիմակներ բաժանել, իսկ դրանց վաճառքն արգելվում է. տեղեկացնում է yerkir.am-ը` Anadolu գործակալությանը հղումով:

Ըստ Էրդողանի` Թուրքիայի առողջապահական համակարգը «կարևոր սահման է անցել»` օրական կատարելով ավելի քան 20 հազար թեստ: Բացի այդ` համավարակի դեմ պայքարի շրջանակներում Ստամբուլի օդանավակայանի մոտակայքում գործելու են երկու նոր հիվանդանոցներ`  1000 մահճակալով:

Թուրքիայի իշխանությունները կբռնագրավեն բժշկական դիմակներ արտադրող այն ձեռնարկությունները, որոնք կհրաժարվեն իրենց արտադրանքը վաճառել կառավարությանը: Այսպիսի վերջնագրով էլ մարտի 23-ին հանդես էր եկել Թուրքիայի ՆԳ նախարար Սուլեյման Սոյլուն: Իսկ ավելի վաղը երկրի պրոֆիլային գերատեսչությունների աշխատակիցները միաժամանակյա ռեյդերի էին կատարել դիմակներ արտադրողների պահեստները և պահանջել առողջապահության նախարարության հետ պայմանագիր կնքել ու դադարեցնել դիմակների պահեստավորումը:

Թուրքիայի առողջապահության նախարարության` այսօր առավոտյան հրապարակած տվյալներով` երկրում կա 30217 վարակված, 649 մարդ մահացել է: