50 օրում թուրքական զինուժը 918 քուրդ զինյալ է սպանել. Anadolu

Թուրքական Anadolu լրատվական գործակալությունը ներկայացրել է հուլիսի 7-ից օգոստոսի 26-ն ընկած ժամանակահատվածում Քրդական բանվորական կուսակցության դեմ Թուրքիայի զինված ուժերի մղած պայքարի պատկերը:

Համաձայն դրա՝  50 օրում Թուրքիայում սպանվել է 60 անվտանգության աշխատակից, որոնց թվում` ոստիկաններ, զինվորներ, թիկնապահներ: Վիրավորվել է 206 քաղաքացիական անձ, որոնցից 3-ը՝ Իրանի քաղաքացի:

Գործակալության հաղորդմամբ՝ Թուրքիայում և նրա սահմաններից դուրս իրականացված ռազմական գործողությունների հետևանքով հուլիսի 22-ից ի վեր թուրքական զինուժի կողմից սպանվել է ՔԲԿ-ի 918 անդամ: Օդային գործողությունների արդյունքում Թուրքիայից դուրս վիրավորվել է 580 ՔԲԿ-ական, իսկ երկրի ներսում՝ 250-300:

Միայն օգոստոսի 24-25-ին՝ 24 ժամվա ընթացքում, ՔԲԿ-ականների և թուրքական ուժերի միջև բազմաթիվ զինված բախումներ են տեղի ունեցել Կարինի, Վանի Էդրեմիթ և Չաթաք շրջաններում, Տիգրանակերտի Սիլվան շրջանում, Ադանայում, Աղրըում (Արարատ լեռան մոտակա շրջաններում), Թունջելիում, Բիթլիսի Հազան շրջանում և Պոլսում: