ՏԵՍԱՆՅՈՒԹ. «Դյութի ֆրի մարկետ Արմենիա» ՍՊԸ-ին հողամաս տրամադրելու հարցը հանվեց օրակարգից

Նիկոլ Փաշինյանի առաջարկով Բագրատաշենի և Բավրայի մաքսային կետ-բաժինների տարածքներից «Դյութի ֆրի մարկետ Արմենիա» ՍՊԸ-ին կառուցապատման իրավունքով հողամաս տրամադրելու մասին որոշման նախագիծը հանվեց օրակարգից:

Նախագծով նախատեսված էր՝ 49 տարի ժամկետով, առանց մրցույթի, կառուցապատման իրավունքով պետական եկամուտների կոմիտեի Արևելյան մաքսատուն-վարչության Բագրատաշենի մաքսային կետ-բաժնին 1036 քառ. մետր, իսկ Հյուսիսային մաքսատուն-վարչության Բավրայի մաքսային կետ-բաժնի կողմից 565.3 քառ. մետր հողամաս տրամադրել «Դյութի ֆրի մարկետ Արմենիա» ՍՊԸ-ին:

Ընկերությունը նախատեսում է նշված տարածքներում անմաքս առևտրի խանութներ կառուցել: Նախատեսվում էր ներդնել մոտ 3.5 մլն եվրո և ստեղծել 250 աշխատատեղ:

Վարչապետ Փաշինյանը առարկեց, այսուհետ որևէ հողատարածք չի տրամադրվելու  առանց մրցույթի:

«Եկեք բացառենք, որ կառավարության որոշմամբ որևէ հողատարածք տրամադրվի որևէ ընկերության: Պետք է ասենք, որ իքս ընկերությունը նման առաջարկ է արել և ով ունի ավելի լավ առաջարկ»,-ասաց կառավարության ղեկավարը:

Փոխվարչապետ Տիգրան Ավինյանը նշեց, որ խնդիրը տեղավորվում է պետական-մասնավոր համագործակցության տիրույթում:

Ըստ ՊԵԿ նախագահ Դավիթ Անանյանի՝ «Դյութի ֆրի մարկետ Արմենիա» ՍՊԸ-ն փորձառու կազմակերպություն է, ունի  միջազգային փորձ: «Մենք կարող ենք մրցույթ հայտարարել, սակայն ունենք չորս ընկերության առաջարկ և ունենք նպատակ չորսին էլ բավարարել»,-նշեց Անանյանը:

Վարչապետ Փաշինյանի խոսքով՝ կառավարության որոշմամբ պետք է հողը դրվի աճուրդի, կհաղթի առավելագույն գին առաջարկողը:

«Ես առաջարկում եմ հարցը հանենք օրակարգից, և, ով հետաքրքրված է այսպիսի ծառայությամբ, թող գա մասնակցի, սահմանենք խիստ աճուրդային պայմաններ: Ընդհանրապես եկեք վերացնենք առանց մրցույթի հող տալու պրակտիկան»,- հորդորեց նա:

Հարցը հանվեց օրակարգից, իսկ վարչապետը սպասում է նոր նախագծի: