Թուրքիայի քիթը տրորեցին. Պոզները՝ ԱՄՆ-ի կողմից Հայոց ցեղասպանության հետ կապված գործընթացի մասին

Հայտնի ռուս լրագրող և գրող Վլադիմիր Պոզները խոսել է ԱՄՆ Կոնգրեսի Ներկայացուցիչների պալատում և Սենատում Հայոց ցեղասպանության ճանաչման գործընթացի մասին:

Իր Instagram-ում պատասխանելով հայ օգտատիրոջ հարցին՝ Պոզները նշել է, որ Ներկայացուցիչների պալատի կողմից բանաձևի ընդունումը քաղաքական ենթատեքստ ունի:«Ի՞նչ եք կարծում, ինչո՞ւ ԱՄՆ Կոնգրեսի Ներկայացուցիչների պալատը 1915-ի կոտորածը ճանաչեց որպես ցեղասպանություն: Ինչո՞ւ հենց հիմա: Հենց այն պատճառով, որ նա ահավոր զայրացած էր Թուրքիայի նախագահ Էրդողանի վրա այն բանի համար, որ նա Ռուսաստանից գնել էր С-400 և հարված հասցրել Սիրիայի հյուսիսում գտնվող քրդերին: Այս ամենը քաղաքական խաղեր են, իրականում, այս ամբողջ պատմությունը նրանց համար նշանակություն չունի»,- գրել է Պոզները:

Վլադիմիր Պոզները նաև ավելացրել է, որ Սենատում Հայոց ցեղասպանությունը ճանաչող բանաձևի արգելափակումը նույնպես տեղավորվում է քաղաքական խաղի տրամաբանության մեջ: