Թուրքիայի ԱԳ նախարարը սպառնացել է ԱՄՆ դեսպանին` Ցեղասպանության հարցի հետ կապված

Թուրքիայի ԱԳ նախարար Մևլութ Չավութօղլուն այսօր հյուրընկալել է Անկարայում ԱՄՆ դեսպան Ջոն Բաասին:

Հայկական սփյուռքի՝ 2015 թվականին Հայոց ցեղասպանության 100-ամյա տարելիցի շրջանակներում նախաձեռնությունների բոլոր հնարավոր ազդեցությունները մեղմելու նպատակով Թուրքիան անցել է հակահարձակման. գրում է թուրքական Haberler-ը:

Ըստ կայքի՝ Անկարան հայտնել է, որ «ԱՄՆ-ի կողմից Հայոց ցեղասպանության ճանաչմանն ուղղված որևէ օրինական բանաձի ընդունման դեպքում Անկարան երկու երկրների հարաբերությունները հիմնովին կվերանայի»:

«Չավուշօղլուն զգուշացրել է, որ ԱՄՆ օրենսդիր մարմինների կողմից Հայոց ցեղասպանության օրակարգ բերվելը բացասական ձևով կազդի երկու երկրների հարաբերությունների վրա»,- նշում է կայքը՝ հերթական անգամ հիշեցնելով նախորդ տարի` այն ժամանակ վարչապետ Ռեջեփ Թայիփ Էրդողանի՝ հայերին ուղղած ցավակցական ուղերձը, որը, թուրքերի կարծիքով, Թուրքիայի կողմից արված մեծ քայլ էր: