Ֆ-35-ները Ս-400-ներից հեռու կլինեն. թուրք դեսպան

Ամերիկյան 5-րդ սերնդի Ֆ-35 կործանիչները կտեղակայվեն Ս-400 ՀՕՊ համակարգերի ազդեցության գոտուց դուրս. հինգշաբթի հայտարարել է ԱՄՆ-ում Թուրքիայի դեսպան Սերդար Քըլըչը` ելույթ ունենալով Վաշինգտոնում` Ազգային մամլո ակումբում:

Ըստ նրա` Ս-400-ներն ու Ֆ-35-ները չեն տեղակայվելու միևնույն գոտում: Թուրք դիվանագետն ուշադրություն է հրավիրել այն հանգամանքին, որ Սիրիայի տարածքով թռչում են Իսրայելի Ֆ-35-ները, և այդ տարածքում նույնպես տեղակայված է Ս-400, սակայն այդ հանգամանքը ոչ մի հարց չի առաջացնում ԱՄՆ-ի մոտ:

«Երբ խոսքը վերաբերում է Թուրքիային, որը ցանկանում է տեղակայել ՀՕՊ համակարգեր, այլ ոչ թե հարձակվողական համակարգ, խնդիրներ են առաջանում»,- Քըլըչի խոսքերն է մեջբերում Sputnik գործակալությունը:

Երեկ պետքարտուղարության պաշտոնական ներկայացուցիչ Մորգան Օրթագուսն իր հերթին զգուշացրել է Թուրքիային, որ Ս-400-ների գնումը կհանգեցնի պատժամիջոցների Թուրքիայի նկատմամբ:

Երեկ Էրդողանն ու Թրամփը հեռախոսազրույց են ունեցել, որի ընթացքում Թուրքիայի նախագահը դարձյալ առաջարկել է համատեղ աշխատանքային խումբ ստեղծել և ևս մեկ անգամ վերահաստատել, որ Թուրքիան չի հրաժարվի Ս-400-ների գործարքից: