ԱՄՆ-ը հնարավոր է ճանաչի Հայոց ցեղասպանությունը, եթե Թուրքիան գործարկի Ս-400-ները. թուրք պատգամավոր

Թուրքիայի Արդահան քաղաքից անկախ պատգամավոր Օզթյուրք Յըլմազն անդրադարձել է երեկ նախագահ Ռեջեփ Թայիփ Էրդողանի` Ս-400-ները ապրիլ ամսին գործարկելու հայտարարությանը և նշել, որ, դրան ի պատասխան, ԱՄՆ-ը կարող է ճանաչել Հայոց ցեղասպանությունը:

«Ս-400-ները 2020 թ. ապրիլ ամսին գործարկելը կարող է հանգեցնել նրան, որ ԱՄՆ Կոնգրեսը ճանաչի, այսպես կոչված, Հայոց ցեղասպանությունը: Դա սխալ տարեթիվ է: Ապրիլին համակարգերի գործարկումը կարող է հանգեցնել նրան, որ այդ ժամանակ ԱՄՆ Կոնգրես ներկայացված, այսպես կոչված, Հայոց ցեղասպանության վերաբերյալ օրինագիծն ընդունվի: Հայոց ցեղասպանության թեման Թուրքիայի գլխին փորձանք է և ամեն տարի ԱՄՆ Կոնգրես ներկայացնելը Թուրքիային շանտաժի ենթարկելու համար է»,- Յըլմազի խոսքերն է մեջբերում haberler.com կայքը: