ԱՄՆ-ում կալանավորվել է WikiLeaks-ի իրազեկիչը

ԱՄՆ Վիրջինիա նահանգի դատարանը կալանավորել է WikiLeaks-ի իրազեկիչ Չելսի Մենինգին, որը կրկին հրաժարվել է պատասխանել այդ կազմակերպությանը և դրա հիմնադիր Ջուլիան Ասանժի վերաբերյալ գործով` երդվյալ ատենակալների հարցերին: Այս մասին տեղեկացնում է The Hill-ը:

Մենինգը (մինչև սեռափոխվելը` Բրեդլին) դատարան է ներկայացել` ցուցմունքներ տալու համար հարկադիր կարգով ներկայանալու պահանջով ծանուցագիրը վիճարկելու նպատակով: Մարտին Մենինգն արդեն հրաժարվել էր երդվյալ ատենակալների հարցերին պատասխանել Վիրջինիայի նահանգի Ալեքսանդրիա քաղաքի դատարանում:

Դեպքի առիթով նա կալանավորվել էր երկու ամսով և ազատ արձակվել մայիսի 9-ին: Մենինգի փաստաբանների պնդմամբ` նա բանտում անցկացրել է 62 օր:

Մենինգն ավելի վաղ հայտարարություն էր տարածել, որ երդվյալ ատենակալներին հրաժարվում է տեղեկատվություն տրամադրել` էթիկական բնույթի նկատառումներից ելնելով, նաև շեշտել, որ որևէ մտադրություն չունի համագործակցելու այդ գործով զբաղվող քննիչների հետ:

Գործի նյութերին առնչվող տեղեկատվությունը գաղտնի է պահվում, սակայն լրատվամիջոցները հայտնել են, որ այն վերաբերում է WikiLeaks-ին ու Ասանժին: Մենինգը, որը մինչ դեպքերի զարգացումն ուներ ցամաքային զորքերի առաջին կարգի շարքայինի կոչում, կալանավորվել էր դեռևս 2010 թվականին այն բանի համար, որ WikiLeaks-ին էր հանձնել ավելի քան 700 հազար ռազմական ու դիվանագիտական փաստաթղթեր, ինչպես նաև տեսանյութեր, որոնք վերաբերում են Իրաքում ԱՄՆ-ի ռազմական գործողությանը: 2013 թվականի օգոստոսին Մենինգը դատապարտվել էր 35 տարվա ազատազրկման:

Լինելով անազատության մեջ` նա սեռը փոխել էր իգականի ու անվանափոխվել Չելսիի: 2017 թվականի հունվարին նրան ԱՄՆ-ի նախկին նախագահ Բարաք Օբամայի որոշմամբ ներում էր շնորհվել, և 2017-ի մայիսին նա ազատ էր արձակվել։