Wikileaks. Տեր-Պետրոսյանի ելույթը նախապես ուղարկվել է ԱՄՆ դեսպանին. ի՞նչ նպատակով

Շահնազարյանը հայտնել է, որ ընդդիմության` հոկտեմբերի 17-ին կայանալիք հանրահավաքը վերջինը կլինի որոշ ժամանակով, քանի որ ընդդիմությունը նոր փուլ է թեւակոխելու: Նա հայտնել է, որ Լեւոն Տեր-Պետրոսյանը Թուրքիայի հետ կառավարության բանակցությունները կօգտագործի իշխանությունների վրա ճնշում գործադրելու համար:

Դեսպանը Շահնազարյանի միջոցով Լեւոն Տեր-Պետրոսյանին խնդրել է ավելի զգույշ եւ կառուցողական լինել հրապարակային ելույթներում, նաեւ զգուշացրել է, որ կառավարությունը կարող է սխալ հասկանալ նրա մտադրությունը:

Շահնազարյանը դեսպանին տեղեկացրել է 70 քաղբանտարկյալների մասին եւ ասել, որ այդ փաստը լինելու է Տեր-Պետրոսյանի հիմնական թիրախը եւ բողոքի թեման: Ըստ նրա` ընդդիմությունը շարունակելու է «կռվել» կառավարության հետ քաղբանտարկյալների ազատ արձակման համար:

Շահնազարյանը տեղեկացրել է, որ առաջիկա հանրահավաքում Տեր-Պետրոսյանի ելույթի տեքստն արդեն մշակված է: Այն թարգմանվում է անգլերեն եւ ռուսերեն լեզուներով: Տեքստում լինելու են նաեւ կոնկրետ «մեսիջներ»` ուղղված ԱՄՆ դեսպանությանը եւ ՀՀ կառավարությանը: Շահնազարյանը դեսպանին խոստացել է ուղարկել ելույթի տեքստը մինչեւ հանրահավաքը:

Դեսպանը փաստաթղթի մեկնաբանության մեջ նշել է, որ Տեր-Պետրոսյանը եւ նրա քաղաքական թիմը գիտակցում են, որ կորցրել են հեղինակությունը ժողովրդի մոտ: Սակայն նրանք այնքան ժամանակ ցույցեր կկազմակերպեն մինչեւ խոչընդոտների չհանդիպեն: «Մենք դեռ չգիտենք, թե ընդդիմության, այսպես կոչված` «հաջորդ փուլ» ինչ է իրենից ներկայացնում: Հուսով եմ` սա նշանակում է ավելի ինտենսիվ մասնակցություն երկրի քաղաքական կյանքին»,- գրել է դեսպանը: