Սա բաց մնացած հարցերի պատասխանները ստանալու համար պայքար է. Կարեն Բաղդասարյան

Սա հակաօրինական բնույթ ունեցող ակցիա չէ, և այն մարդիկ, որոնք ոչ իրավաչափ գործողություններ կիրականացնեն, «Սպայկա»-ի հետ կապ չունեն: Այս մասին Կենտրոնի վարչական շրջանի ընդհանուր իրավասության դատարանի առջև հայտարարեց  «Սպայկա» ՍՊԸ-ի նախագծերի կառավարման բաժնի ղեկավար Կարեն Բաղդասարյանը:

«Մենք ճանապարհ չենք փակում, բռնություն չենք կատարում, բոլոր սադրիչները մեզ հետ կապ չունեն: Որևէ մեկդ իրավապահների նկատմամբ թույլ մի' տվեք որևէ կոպիտ գործողություն: Սա բաց մնացած հարցերի պատասխանները ստանալու համար պայքար է, և դուք քիչ առաջ պահանջում էիք, թե ով է տալու այդ հարցերի պատասխանը»,- նշեց նա:

Դատարանի առջև հավաքվածները արձագանքեցին, որ վարչապետ Նիկոլ Փաշինյանը պիտի տա այդ` բաց մնացած հարցերի պատասխանը: 

Հիշեցնենք, որ Սպայկա» ընկերության տնօրեն Դավիթ Ղազարյանին մեղադրանք է առաջադրվել  ՀՀ քրեական օրենսգրքի 205-րդ հոդվածի 2-րդ մասով՝ ավելի քան 7 մլրդ դրամի մաքսատուրք և հարկ վճարելուց խուսափելու հատկանիշներով:

Դավիթ Ղազարյանը հրավիրած ասուլիսում նշել էր, որ  ներկայացված 7 մլրդ դրամի պահանջը շինծու է, և դա գնահատում է որպես  ՊԵԿ-ի կողմից հետապնդում  «Սպայկա»–ի նկատմամբ: