Էլեկտրաէներգիայի գնի հետ կապված հարցերի պատասխանները՝ սեպտեմբերի վերջին

Այսօր կառավարության նիստի օարակարգին անցնելուց առաջ ՀՀ վարչապետ Հովիկ Աբրահամյանն անդրադարձավ աուդիտորական «Դելոյթ և Տուշ» ընկերության` ՀԷՑ-ում անցկացվելիք փորձագիտական աշխատանքին: Նա խոսքը տվեց փոխվարչապետ Վաչե Գաբրիելյանին, ով ներկայացրեց գործընթացը:

Գաբրիելյանը նշեց, որ «Դելոյթ և Տուշ» ընկերությունն արդեն սկսել է իր աշխատանքները, տեղի են ունեցել հանդիպումներ ՀԾԿՀ մասնագետների հետ: Ըստ պայմանագրի` աշխատելու են երեք փուլով, առաջին փուլի աշխատանքները վերջանում են սեպտեմբերի վերջին, երկրորդ փուլի աշխատանքները՝ հոկտեմբերի վերջին, իսկ երրորդ փուլի աշխատանքները՝ նոյեմբերին:

Մասնավորապես` առաջին փուլում տրվելու են հետևյալ հարցերի պատասխանները` ամբողջ արտադրական շղթայի վերլուծություն` սկսած 2010-ից մինչև 2015թթ., էներգետիկ հաշվեկշռի վերլուծություն, ՀԾԿՀ կողմից սահմանվող սակագների ձևավորման գործընթացի վերլուծություն, սակագների վերանայման պատճառները, պարբերականությունը:

«Հիմնավորումները մինչև սեպտեմբերի վերջը կունենա՞նք»,- հարցրեց Հովիկ Աբրահամյանը:

Վաչե Գաբրիելյանը պատասխանեց, որ սեպտեմբերի վերջին կունենան եզրակացություն սակագների փոփոխության հիմնավորման վերաբերյալ, սակագների չբարձրացման դեպքում` հետևանքների եզրակացության վերաբերյալ: