Պայքարը շարունակելու ենք որպես արտախորհրդարանական ուժ. հետընտրական քննարկումներ

Այսօր քաղաքական ուժերի ներկայացուցիչներն իրենց գնահատականը տվեցին խորհրդարանական ընտրություններին: Քննարկմանը մասնակցում էին ՀՅԴ ԳՄ անդամ Արթուր Ղազարյանը, «Իմ քայլը» դաշինքից Համազասպ Դանիելյանը, «Մենք» դաշինքից Թեհմինա Վարդանյանը, «Լուսավոր Հայաստան» կուսակցությունից Անի Սամսոնյանը:

Թեհմինա Վարդանյանը նշեց, որ իր համար սպասելի էր «Իմ քայլը» դաշինքի ձայների քանակը: Նրա բնորոշմամբ` այս ընտրություններն աննախադեպ ազատ և արդար են եղել:

Համազասպ Դանիելյանը համաձայնեց գործընկերոջ` Թեհմինա Վարդանյանի գնահատականի հետ: «Ակնհայտ է, որ Հայաստանի Հանրապետության պատմության մեջ ունեցել ենք լավագույն համապետական ընտրությունները»,- ասաց նա:

Դանիելյանը նշեց, որ ուսումնասիրել է թե' տեղական, թե' միջազգային դիտորդական առաքելությունների հայտարարությունները: «Պետք է ասեմ` միջազգային դիտորդների մասով ունենք գնահատական, որը ոչ միայն ամենադրականն է, որ երբևէ ստացվել է Հայաստանի ընտրությունների մասով, այլև, կարծում եմ,  ԱՊՀ տարածքում նման բարձր գնահատական պարունակող զեկույց չի եղել, և սա ոչ թե «Իմ քայլի», այլ Հայաստանի ձեռքբերումն է»,- ասաց նա:

Դիտարկմանը` որովհետև իշխանությունը խնդիր չուներ 50+1%-ը հաղթահարելու, Դանիելյանը պատասխանեց, որ ակնհայտն այն է, որ կազմակերպվել են լավագույն ընտրությունները:

«Լուսավոր Հայաստան»-ի ներկայացուցիչ Անի Սամսոնյանն էլ նշեց, որ գովելի է` վերջապես եղան խորհրդարանական ընտրություններ, երբ ժողովրդի ազատ կամաարտահայտությամբ ընտրվեց խորհրդարան: Նրա խոսքով` իհարկե, եղել են նաև խախտումներ, որոնք արձանագրվել են, բայց դրանք եղել են իներցիայով, և շատ աշխատանք պետք է տարվի, որ դրանք բացառվեն:

Սամսոնյանը վերահաստատեց, որ խորհրդարանում ընդդիմություն են լինելու: Միևնույն ժամանակ ընդգծեց` չեն լինելու այնպիսի ընդդիմություն, որը նախկինում է եղել: «Չենք լինելու այնպիսի ընդդիմություն, որ ունեինք նախկինում, որովհետև այս իշխանությունը գող չէ, կոռումպացված չէ, մյուս կողմից` անհրաժեշտ է ընդդիմություն: Որևէ իշխանություն չի կարող չունենալ սխալներ, իսկ իշխանության այդ սխալները մատնանշողը լինելու է «Լուսավոր Հայաստանը»,- վստահեցեց նա:

ՀՅԴ ներկայացուցիչ Արթուր Ղազարյանն էլ, խոսելով ՀՅԴ տարածած հայտարարության մեջ տեղ գտած այն մտքի մասին, որ ձևավորվում է առանց ազգային դիմագծի խորհրդարան, ասաց, որ այդ համոզմանն են եկել խորհրդարան անցած քաղաքական ուժերի գործունեության պատճառով: «Հիմնականում Ազգային ժողով անցած քաղաքական ուժերի գործունեությունն է դա ցույց տվել. ազգային գաղափարախոսությունը բացակայում է, այդ ուժերը չեն արտահայտել, թե ինչ գաղափարական գիծ են տանում: Որոշ անձանց քայլերից պարզ է, որ մեր բարձրացրած այդ անհանգստությունը կա, այդ պատճառով է, որ հայտարարել ենք, որ ազգային դիմագիծ չունեցող ԱԺ է: Բայց, իհարկե, նրանց մեջ կան անհատներ, որ այդ դեմքն ունեն»,- ասաց նա:

Ղազարյանը, այդուհանդերձ, հաջողություն մաղթեց խորհրդարան անցած ուժերին, որպեսզի կարողանան կերտել ժողովրդի ակնկալած պետությունը: Նա չհամաձայնեց հնչեցրած այն կարծիքներին, որ այս խորհրդարանական ընտրություններն աննախադեպ էին: «Աննախադեպ էր, որ ընտրակաշառք չկար, սակայն կասկածելի է` վարչական ռեսուրս կիրառվե՞լ է, թե՞ ոչ: Աննախադեպ ժողովրդավարական ընտրություններ, որպես այդպիսին, տեղի չեն ունեցել: Դա փաստվեց  քարոզարշավի ընթացքում սև փիարով, մյուս ուժերին վատաբանելու փաստով: Ես մեկ անգամ առիթ ունեցել եմ ասելու, որ ընտրությունների ժողովրդավար լինելը չի փաստվում միայն բուն քվեարկությամբ»,- ասաց նա:

Ղազարյանը հավաստիացրեց` Դաշնակցությունը չի փախչի երկրից կամ ձեռքերը ծալած նստի:  «Պայքարը շարունակելու ենք որպես արտախորհրդարանական ուժ, մեր դերն ունենալու ենք թե' Հայաստսանի, թե' Սփյուռքի, թե' Արցախի կյանքում»,- ասաց նա:

Մասնակիցները հետաքրքրվեցին` ի՞նչ նկատի ունի Ղազարյանը, երբ ասում է ազգային գիծ, ու ի՞նչ է արել ՀՅԴ-ն այդ առումով խորհրդարանում, որ չեն արել կամ չեն անի մյուս ուժերը` 20 տարի լինելով խորհրդարանում:

Ղազարյանը նախ հիշեցրեց, որ ՀՅԴ-ն 20 տարուց ավելի ներկայացված եղել Ազգային ժողովում, և ասաց, որ  տրամադրված մեկ րոպե ժամանակը բավարար չէ` թվարկելու ՀՅԴ ամբողջ արածն ԱԺ-ում: «Դաշնակցությունն արել է այն, ինչ բխում է բացառապես ազգի շահերից»,- նշեց նա:

Մեղադրանքին էլ, թե Դաշնակցությունը կցորդ է եղել, Ղազարյանը հակադարձեց. «Դաշնակցությունը երբեք որևէ մեկի կցորդը չի եղել, եթե նույնիսկ կոալիցիոն մաս է կազմել, ապա դա արել է իր օրակարգով, իսկ երբ օրակարգը չի իրականացել, դուրս է եկել»: