ՀՅԴ-ն սոցիալական արդարության հաստատման առաջամարտիկն է լինելու

Yerkir.am-ի զրուցակիցն է ԱԺ արտահերթ ընտրություններում ՀՅԴ ցուցակով թիվ 2 ընտրատարածքում պատգամավորության թեկնածու առաջադրված Խաչատուր Ստեփանյանը: 

Ծնվել է 1976 թ. Ջավախքի Ղադոլար գյուղում: 1998 թ. ավարտել է Խ. Աբովյանի անվան հայկական պետական մանկավարժական համալսարանը, իսկ 2001 թ. նույն բուհի ասպիրանտուրան՝ Հայոց պատմություն մասնագիտությամբ: 2001-2006 թթ. վերադարձել է Ջավախք և հիմնադրել ու ղեկավարել Ա-ԻՆՖՈ լրատվական գործակալությունը: Նույն տարիներին համակարգել է Ջավախքի հասարակական-քաղաքական կազմակերպությունների խորհրդի գործունեությունը: 2006-ից դասավանդում է Խ. Աբովյանի անվան ՀՊՄՀ Հայոց պատմության ամբիոնում: 2016-2017 ուստարվանից Բուդապեշտի Պիտեր Պազմանի կաթոլիկ համալսարանի հրավիրված դասախոս է: 2004 թ. ստացել է պատմական գիտությունների թեկնածուի, 2018թ.՝ պատմական գիտությունների դոկտորի գիտական աստիճան:

-Ինչո՞ւ եք որոշել ԱԺ ընտրություններին առաջադրվել ՀՅԴ ցուցակով:

- Ծանր փորձություններ են սպասվում: Վերջին ամիսներին Հայաստանում տեղի ունեցող քաղաքական գործընթացները դրանց վառ ապացույցն են: Հայ Յեղափոխական Դաշնակցությունը` որպես դերակատար և պատասխանատվությունից չխուսափող կուսակցություն, որոշել է հանձնառություն ստանձնել, ես էլ` որպես դաշնակցական, պատրաստակամություն եմ հայտնել մասնակից լինելու այդ հանձնառությանը:

-Ի՞նչ խնդիրներ եք տեսնում, որ Դաշնակցությունը պետք է հետապնդի  գալիք խորհրդարանում, եւ անձամբ Դուք ի՞նչ խնդիրներ եք բարձրացնելու, եթե ընտրվեք:

- Դաշնակցությունը` որպես, թերևս, ամենակայացած գաղափարական-քաղաքական կազմակերպություն, կարող է և պետք է հետամուտ լինի մեր երկրի ներքին և արտաքին բազմապիսի խնդիրների լուծմանը: Անձամբ ես` որպես կրթության ոլորտի մասնագետ, կարող եմ օգտակար լինել Հայաստանի կրթական համակարգի բարելավմանը: Լինելով ջավախքցի, երկար տարիներ աշխատելով Ջավախքում` խորապես ծանոթ եմ Հայաստանի համար շատ զգայուն Ջավախքի հիմնախնդիրներին, հայ-վրացական հարաբերությունների առկա բացերին: Կարծում եմ` գոյություն ունեցող աշխարհաքաղաքական գործընթացներում հայ-վրացական համագործակցությունն այլընտրանք չունի: Ես էլ կարող եմ մեծապես օգտակար լինել հայ-վրացական հարաբերությունների զարգացման գործընթացներին:

-Արդյո՞ք անհրաժեշտություն է, որ ՀՅԴ-ն ներկայացված լինի գալիք խորհրդարանում, որո՞նք են այս հարցում ձեր փաստարկները:

- Անկախ տարբեր մարդկանց ունեցած տարբեր քաղաքական համակրանքներից` կարծում եմ, որ բոլորն էլ ներքին համոզմունք ունեն, որ ՀՅԴ-ն անհրաժեշտ լրացուցիչ որակներ է հաղորդում մեր երկրի խորհրդարանին: Որպես սոցիալիստական կուսակցություն` ՀՅԴ-ի դերակատարությունն առանցքային է լինելու երկրում սոցիալական արդարության հաստատման տեսանկյունից:  Դեռևս ամիսներ առաջ մեր կուսակցությունը հրապարակել է  սոցիալ-տնտեսական գործունեության հայեցակարգը, որի հիմքում ընկած են տնտեսական և սոցիալական բնագավառների երեք հիմնարար արժեքներ՝ ազատությունը, արդարությունը և համերաշխությունը: Որպես ազգային կուսակցություն` Դաշնակցությունը լուրջ անելիքներ ունի: Գաղտնիք չէ, որ համաշխարհայնացման այս դարաշրջանում Հայաստանում վտանգված են մի շարք ազգային արժեքներ՝ հայ ավանդական ընտանիքը, Հայ Առաքելական եկեղեցին, թիրախում կարող է հայտնվել նաև «Ազգ-բանակ» հայեցակարգը: Կարծում եմ` այս բոլորը և բազում այլ ազգային արժեքներ իրավական պաշտպանության կարիք ունեն:

-Ինչպե՞ս եք պատկերացնում Դաշնակցության  փոխհարաբերություններն այլ քաղաքական ուժերի հետ եւ մասնավորապես` խորհրդարանական գործունեության ընթացքում:

- Արդեն հայտարարվել է, որ Դաշնակցությունն առաջիկա ընտրություններից հետո կոալիցիայի մեջ չի մտնելու որևէ ուժի հետ: Քանի որ ժողովրդի նախատրամադրվածությունից ակնհայտ է, թե որ ուժն է հաղթելու այս ընտրություններում, Դաշնակցությունը խորհրդարանում հանդես է գալու որպես ընդդիմություն: Եվ մեր փոխհարաբերություններն այլ քաղաքական ուժերի հետ կկառուցվեն այդ տրամաբանությամբ:

- Ո՞ր հարցերն են, որ առաջնահերթ եք համարում մեր երկրի համար, ի՞նչ է անում ՀՅԴ-ն այս ուղղությամբ եւ ի՞նչ է պատրաստվում անել, եթե կրկին դառնա խորհրդարանական կուսակցություն:

- Մեր երկրի համար կան մի շարք առաջնահերթ խնդիրներ, բայց ես կառանձնացնեի երեքը, որոնք ուղղակի առնչվում են մեր ազգային անվտանգությանը: Արցախի խնդիրը, և այստեղ մենք ուղղակի պարտավոր ենք երաշխավորել հիմնախնդրի հայանպաստ կարգավորումը: Սա ազգային անվտանգության լուրջ հարց է, և ՀՅԴ-ն իր վճռական խոսքն ունի ասելու: Արդարության խնդիրը.  մեր երկրում նախորդ տարիներին տեղի ունեցած և այսօր էլ շարունակվող արտագաղթի հիմնական պատճառը անարդարությունն է՝ սոցիալական անարդարությունը, իրավական անարդարությունը, տնտեսական անարդարությունը: Ազգային անվտանգությանը սպառնացող արտագաղթը կանխելու համար մեր երկրում օր առաջ պետք է հաստատվի արդարություն: Իմ կարծիքով` անվտանգության խնդիր է նաև սերունդների հայեցի դաստիարակության, ազգային կրթության ապահովումը: Կրթական համակարգի աղավաղումը և խաթարումը, դաստիարակության ճիշտ ուղուց շեղվելը անդառնալի ծանր հետևանքներ կարող են ունենալ: ՀՅԴ-ն առաջինն այս խնդիրների շեփորահարն է լինելու խորհրդարանում:

-Այսօր ՀՅԴ-ի հասցեին տարբեր կողմերից հնչում են քննադատություններ, ինչպե՞ս եք վերաբերվում դրանց, ինչպե՞ս եք գնահատում այս երեւույթը:

- Եթե ՀՅԴ-ի հասցեին հնչող մեղադրանքներն ունեն առարկայական հիմնավորում, պետք է ընդունել: Մեր կուսակցության ղեկավարության կողմից այս մոտեցման մասին, եթե չեմ սխալվում, տարբեր առիթներով հայտարարվել է: Օրինակ՝  կոալիցիային մաս կազմելու վերաբերյալ: Բայց հնչում են նաև քննադատություններ, որոնք խիստ  ենթակայական են, որևէ աղերս չունեն իրականության հետ: Դրանց մի մասն, անշուշտ, անտեղյակության հետևանք է: Ենթակայական բնույթի քննադատությունների կարևոր բաժինը կազմում է քննադատողների` ի սկզբանե ունեցած հակադաշնակցական տրամադրությունը: Այդպիսի քննադատները դաշնակցականներին կարող են մեղադրել նույնիսկ հանուն հայ ժողովրդի զոհվելու համար:

-ՀՅԴ-ն մեր երկրի ամենահարուստ կենսագրություն ունեցող եւ ամենակազմակերպված կուսակցություններից է, եթե ոչ` ամենափորձառուն ու կազմակերպվածը: Որքանո՞վ են այդ գործոնները  օգնում կուսակցության գործունեությանը եւ որքանո՞վ են դերակատար հենց  խորհրդարանական գործունեության ժամանակ:

- Նախ ասեմ, որ իր 128 տարվա պատմության ընթացքում ՀՅԴ-ն միշտ չէ, որ եղել է խորհրդարանում: Սակայն հայ ժողովրդին հուզող հիմնախնդիրների վերաբերյալ ՀՅԴ-ի առաջարկած օրակարգն այնքան ընդգրկուն է, որ մեր կուսակցությունը խորհրդարանից դուրս էլ հսկայական անելիք ունի: ՀՅԴ պատմությունը փաստում է այդ մասին: Համահայկական խնդիրներ լուծելու փորձառությունը թերևս ամենակարևոր գործոնն է, որ կարող է մեծ դերակատարում ունենալ մեր խորհրդարանական գործունեության համար: Ինձ համար պակաս կարևոր չէ նաև ՀՅԴ-ի` սոցիալիստական կուսակցություն լինելու հանգամանքը: Մեր այս գաղափարախոսությամբ մենք Հայաստանում սոցիալական արդարության հաստատման առաջամարտիկն ենք լինելու:

-Հաշվի առնելով երկրում առկա իրավիճակը՝ ժողովրդական շարժումը, եւ դրան հետեւած  էյֆորիկ մթնոլորտը` դժվար կլինի քաղաքական  ուժերի համար համոզել ընտրողին` վստահության քվե տալ իրեն: Ի՞նչ եք պատրաստվում առաջարկել ընտրողին, ի՞նչ նոր մոտեցում ու շեշտադրում եք անելու, որ հենց ձեզ վստահի ընտրողը, ձեր ուժին ընտրի:

- Այս իրավիճակում իսկապես դժվար է լինելու գաղափարական ընտրություն կատարել: Բայց ընտրարշավի ընձեռած, թեև կարճ, հնարավորությունը պետք է լավագույնս օգտագործել մեր առաջիկա անելիքի մասին ընտրողներին տեղեկացնելու համար: Ես` որպես թեկնածու, բաց ճակատով եմ մոտենալու յուրաքանչյուր ընտրողի: Ջավախքում  իրականացրած գործունեությունը, բուհի նվիրյալ դասախոսի անբիծ կենսագրությունը ինձ դրա իրավունքը տալիս են:

Մ.Մ.