Սասուն Միքայելյանը իր գիտակցածի չափով է ուզում չափել արցախյան ազատամարտի նշանակությունը. Արտաշես Մխիթարյան

ՀՅԴ Գերգույն Մարմնի Ազատամարտիկների հանձնախմբի պատասխանատու, պահեստազորի գնդապետ, արցախյան ազատամարտի մասնակից, Շուշիի առանձին հրաձգային գումարտակի  ՀՅԴ շտաբի պետ, ՀՅԴ Գյումրիի շոկատի հրամանատար Արտաշես Մխիթարյանը Yerkir.am-ի հետ զրույցում անդրադարձել է  «Իմ քայլը» դաշինքի պատգամավորի թեկնածու Սասուն Միքայելյանի հայտարարությանը, թե հեղափոխության  հաղթանակն ավելի կարևոր էր, քան Ղարաբաղյան պատերազմի հաղթանակը:

«Եթե Սասուն Միքայելյանը, մասնակից լինելով արցախյան ազատամարտին, նման հայտարարություն է արել, ուրեմն ինքը, ամենայն հավանականությամբ, գիտակցաբար չի մասնակցել այդ ազատարամարտին, այլ ոգևորության ալիքի տակ է մասնակցել: Եվ իր գիտակցածի չափով է ուզում չափել արցախյան ազատամարտի նշանակությունը: Հավանաբար, Սասուն Միքայելյանը այս իշխանափոխությունից ավելի մեծ օգուտ է ստացել, քան արցախյան ազատամարտից »,- ասաց Արտաշես Մխիթարյանը` հավելելով, որ արցախյան ազատամարտը ամբողջ հայության հաղթանակն է եղել, և ազատամարտի ժամանակ տանջանքներ ու զրկանքներ է կրել ողջ հայությունը :

Հարցին, թե հնարավոր համարու՞մ է, որ գուցե, Սասուն Միքայելյանը սխալ է ձևակերպել իր միտքը, Արտաշես Մխիթարյանը նշեց. «Ոչ թե սխալ է ձևակերպել, այլ միտումնավոր խեղաթյուրել է արցախյան ազատամարտը: Ոչ միայն Սասուն Միքայելյանի կողմից, այլև նոր իշխանության շատ անդամների կողմից պարբերաբար խեղաթյուրվում է հայոց պատմությունը, նսեմացվում է մեր ազատագրական պայքարը: Ինչ-որ միտում եմ ես տեսնում: Կան  երիտասարդներ, որոնք ոչ բանակից գաղափար ունեն, ոչ էլ արցախյան ազատամարտից, ու կարող են շիզոֆրենիկ անվանել արցախյան ազատամարտը արժևորողներին: Ու երբ այսպես կոչված ազատամարտի մասնակիցն է նման հայտարարություն անում, դա արդեն միտում է: Իսկ զոմբիացած մասսան էլ ծափահարում է այդ ապուշություններին` հու-հու գոռալով»: