Հայաստանում ծնելիությունը շարունակում է նվազել, իսկ 2050-ին տարեցների թիվը կհասնի 20%-ի

2018 թվականի  առաջին կիսամյակի դրությամբ  ծնելիությունը Հայաստանում նվազել է  10.000-ով: Այս մասին լրագրողների հետ հանդիպման ժամանակ հայտնեց ՄԱԿ-ի Բնակչության հիմնադրամի «Օժանդակություն բնակչության  հարցերով քաղաքականությունների  իրականացմանը» ծրագրի համակարգող  Աննա Հովհաննիսյանը: Նրա խոսքով` Հայաստանում ծնելիության ամենաբարձր ցուցանիշը գրանցվել էր 1990-ին: 

Իսկ թե ո՞րն է նվազման հիմնական պատճառը, ՄԱԿ-ի ԲՀ-ի հայաստանյան գրասենյակի  գործադիր  ներկայացուցիչ Ծովինար Հարությունյանի համոզմամբ, Հայաստանում տիրող սոցիալական ծանր պայմաններն են:  «Կառավարությունը խոսում է միայն  ցածր ծնելիության բարձրացման խնդրի մասին, այնինչ  արտագաղթի ու ներգաղթի խնդիրները ևս առաջնահերթ լուծման կարիք ունեն:  Ունենալով քիչ ծնելիություն` մեր երկիրը բազմաթիվ խնդիրների առջև կարող է կանգնել,- ասաց Հարությունյանը,և հավելեց,- ՄԱԿ-ի ԲՀ-ի հետազոտությունները պարզել են, որ ընդամենը 30 տարի հետո  տարեցների թիվը Հայաստանում կհասնի ընդհանուր բնակչության թվի  20 տոկոսին: Դա շատ լուրջ սոցիալական մարտահրավեր է մեր երկրի համար, այսինքն` 5-ից 1-ը  կլինի 60 տարեկան»: 

Ըստ բանախոսների`  կառավարությունն այս ուղղությամբ ահռելի աշխատանք ունի կատարելու, թեև վերջերս ընդունված` նպաստների բարձրացման մասին օրենքն  ուղղված է նաև ծնելիության խթանմանը, սակայն Աննա Հովհաննիսյանը նշեց, որ  միջազգային փորձը ցույց է տալիս, որ ծնելիության համար հատկացվող նպաստն այնքան էլ չի  ազդում ծնելիության բարձրացման վրա:  Ըստ նրա` այս խնդիրն ավելի հիմնավոր պատճառներ ունի. Հայաստանում  գործազրկության մակարդակը  բարձր է, այդ դեպքում էլ անհրաժեշտ է պետական միջամտություն:

Հարությունյանը նշեց, որ լուրջ խնդիրներ կան նաև երեխայի խնամքի կենտրոնների աշխատաժամերի հետ կապված. մանկապարտեզներում և նման կենտրոններում աշխատանքային ժամն ավելի շուտ է վերջանում, քան ծնողների աշխատանքային ժամերը: Այս առիթով  Հարությունյանը ներկայացրեց Կանադայի և մի շարք եվրոպական երկրների փորձը, որտեղ  աշխատել ցանկացող կանանց համար աշխատաշուկայում վերացվում են հնարավոր բոլոր խոչընդոտները:  Դիտարկելով մեր երկրում իրականացվելիք հնարավոր լուծումները`  բանախոսները նշեցին, որ կառավարությունը շեշտը պետք է դնի հատկապես  մարդու ազատ ընտրության վրա, և ստեղծի այնպիսի  պայմաններ, որպեսզի մարդիկ ունենան այնքան երեխա, որքան ուզում են:

Ինչ  վերաբերում է Հայաստանի բնակչության թվին,  ՄԱԿ-ի ԲՀ-ի հետազոտությունների արդյունքով` այն ևս նվազել է: 2018 թ.  հուլիսի 1-ի դրությամբ ՀՀ ընդհանուր բնակչության թիվը կազմում է 2.969.800 մարդ, այնինչ` 2017-ի հուլիսի 1-ի դրությամբ 2.979.900 մարդ էր: Ծնելիության պատկերն այսպիսին է ` 2018 թ. առաջին կիսամյակում ծնվել է  16.189 երեխա, իսկ նախորդ տարվա նույն ժամանակահատվածում` 17.170 երեխա: 

Ի դեպ, Հայաստանի ժողովրդագրական վիճակը տարբերվում է հարևան երկրների ժողովրդագրական ցուցանիշներից. Հայաստանում գրանցվել է 1.6%,  Վրաստանում և Իրանում` 1.90, իսկ Թուրքիայում և Ադրբեջանում` 2,7 % ժողովրդագրական աճ:

Բացի դրանից, այս ամենին զուգահեռ, Հայաստանը, ըստ ՄԱԿ-ի տվյալների,  համարվում է նաև ծերացող երկիր: Թեև մահացությունների թիվն այս տարի նվազել է 1500 դեպքով,  (անցած տարի 14.500 էր, այս տարի` 13.000), բայց բնակչության ընդհանուր թվի հարաբերակցությամբ`  տարեցների թիվը կազմում է 63 %:  Իսկ ծնելիության թվի  10.000-ի նվազումը, ըստ հետազոտությունների, արտագաղթի հետևանք է: 

Բանախոսները հույս հայտնեցին, որ ապագայում նման ցուցանիշներ  չենք ունենա կառավարության համապատասխան ջանքերի և վերոնշյալ խնդիրների լուծման շնորհիվ: