Իմ երեխան թեկնածություն ա դրել, ուզում եմ մրցակցության մեջ մտնի. Սասուն Միքայելյան

Հայտնի է, որ Հրազդանի քաղաքապետի ընտրություններում թեկնածություն է առաջադրել ԱԺ «Ելք» խմբակցության պատգամավոր, ՔՊ վարչության նախագահ Սասուն Միքայելյանի որդին` Սևակ Միքայելյանը: ՔՊ-ն էլ հայտարարություն էր տարածել, թե կուսակցությունը չի աջակցի Սևակ Միքայելյանին:

Խորհրդարանում լրագրողների հետ զրույցում պատասխանելով հարցին, թե ինչո՞ւ  կուսակցությունը չի սատարում իր որդուն, Սասուն Միքայելյանը պատասխանեց, որ ցանկանում են`  ազատ մրցակցություն լինի: «Պետք է լինի ազատ մրցակցություն, որ մյուս թեկնածուները ընկճված չլինեն: Կա 5 թեկնածու: Իմ ցանկությունն էլ է եղել, որպեսզի ազատ մրցակցություն լինի»,- ասաց նա:

Միքայելյանը նշեց, որ եթե մեկին պաշտպանում է կուսակցությունը, այդ թեկնածուն ինչ-որ տեղ առավելություն է ունենում:

Դիտարկմանը` վարչապետը Երևանի ավագանու ընտրություններում սատարում էր Հայկ Մարությանին, Միքայելյանն արձագանքեց, որ իր ցանկությունն է, որ Հրազդանում նորմալ ընտրություններ լինեն: «Ինչպես իմ տղան, այնպես էլ 20 տարին լրացած ՀՀ քաղաքացիները իրավունք ունեն թեկնածություն դնեն: Հիմա իմ երեխան թեկնածություն ա դրել, ես ուզում եմ մրցակցության մեջ մտնի` ազատ ու ակտիվ, հաղթի` հաղթի, չէ` չէ»,- ասաց նա:

Միքայելյանը նշեց, որ որդու քարոզարշավին չի մասնակցելու: «Իմ որդին է թեկնածությունը դրել, ես չեմ դրել, ես քարոզարշավին չեմ մասնակցելու»,- ասաց նա: