Եթե իմանայի հանրության մեջ հնչեղություն կստանա, միջնորդագիր չէի ներկայացնի Նորատուսցի Ալիկի համար. Սասուն Միքայելյան

ԱԺ «Ելք» խմբակցության պատգամավոր Սասուն Միքայելյանը վստահեցնում է, որ Ալիկ Բանդուրյանին (Նորատուսցի Ալիկ) ընդհանրապես չի ճանաչում: Խորհրդարանում լրագրողների հետ զրույցում նա նշեց, որ ընդամենը միջնորդագիր է ստորագրել, որովհետև իրեն խնդրել են:

«Ինձ խնդրեցին, ասացին, որ իր վիճակը ծայրահեղ ծանր է: Ընդամենը ստորագրել եմ` հիվանդության հետ կապված, բայց եթե իմանայի հանրության մեջ նման հնչեղություն կստանար, չէի անի: Հանրային կարծիքն ինձ համար իմ կյանքից ավելի բարձր է»,- ասաց պատգամավորը:

Նա նշեց, որ իր այս քայլն ավելի խորքային հիմքեր ունի: «Ես եղել եմ կալանավոր, այդ տարիների ընթացքում մեծ խոչընդոտներ են եղել կալանավայրերում, որ հիվանդ մարդիկ քաղաքացիական հիվանդանոցներում պետք է բուժվեն: Պրոբլեմ ա եղել, ես եմ միջնորդել, որ այդ մարդկանց տանեն հիվանդանոցներ` բուժման համար: Շատ դեպքերում չեն տարել, մարդիկ մահացել են հենց կալանավայրերում»,- իր արարքն այսպես բացատրեց պատգամավորը:

Նշենք որ Նորատուսցի Ալիկի համար Սասուն Միքայելյանի հետ միջնորդություն էին ստորագրել մի քանի ԲՀԿ-ական պատգամավորներ:

Սասուն Միքայելյանը նաև հերքեց այն լուրերը, թե ցանանկանում է ԵԿՄ նախագահ դառնալ: «Որ խնդրեն, աղաչեն, պաղատեն էլ, չեմ ուզում»,- ասաց նա: