Պետք է ապահովենք հանդիսատեսի հոսք, որն էլ իր հետևից կբերի ֆինանսավորում. Նիկոլ Փաշինյան

Մեր խնդիրը չպետք է լինի այն, որ մենք մշակութային գործունեությամբ զբաղվող բոլոր կազմակերպություններին տանք պետական կարգավիճակ և չեղած միջոցներն ավելի քչացնենք. «Արամ Խաչատրյան» համերգասրահում մշակույթի գործիչների հետ հանդիպման ժամանակ հայտարարեց ՀՀ վարչապետ Նիկոլ Փաշինյանը:

«Իհարկե, մենք խնդիր ենք դրել պետական միջոցների մեծացման, բայց ես կարծում եմ, որ եթե նույնիսկ ֆինանսավորմանն է վերաբերում խոսքը, պետք է գնալ հակառակ ուղղությամբ. մենք պետք է ապահովենք որոշակի հավասար դաշտ և մշակութային կազմակերպությունների համար փորձենք վարել այնպիսի քաղաքականություն, որ ապահովենք հանդիսատեսի հոսք, որն էլ իր հետևից կբերի ֆինանսավորում»,- ասաց վարչապետը:

Վարչապետի կարծիքով` եթե որևէ կազմակերպության ֆինանսավորեն անհրաժեշտ ծավալներով, բայց նրա համերգները շարունակեն անցնել դատարկ դահլիճներում, սա կնշանակի պետության միջոցների ոչ արդյունավետ վատնում: «Մենք պետք է քաղաքացիներին քաջալերենք, ուղղորդենք դեպի համերգասրահներ, թատրոններ, և պետք է խմբերն ու  կոլեկտիվներն էլ ավելի գրավիչ դառնան այն մարդկանց համար, ովքեր մղվում են դեպի համերգասրահներ, այսինքն` մենք պետք է ֆինանսավորենք ոչ թե ուղղակի, այլ անուղղակի»,- ասաց Փաշինյանը: