Մենք մարզպետ չենք նշանակել, որ նրանով ձայն ապահովենք. Արմեն Ռուստամյան

Այսօր խորհրդարանական ճեպազրույցներում ԱԺ ՀՅԴ խմբակցության ղեկավար Արմեն Ռուստամյանը, պատասխանելով հարցին, թե ճի՞շտ են տեղեկությունները, որ ՀՅԴ-ն դժգոհ է Շիրակի ՀՅԴ-ական մարզպետ Հովսեփ Սիմոնյանից, որովհետև ՏԻՄ ընտրություններում ՀՅԴ-ն ցածր արդյունքներ ունեցավ, ասաց, որ նախևառաջ մարզպետի գործառույթը ձայներ ապահովելը չէ:

«Մենք մարզպետ չենք նշանակել, որ նրանով ձայն ապահովենք, կամ նա պետք է գնար, ձայներ հավաքեր: Մարզպետի խնդիրն այն է, որ նա կարողանա տվյալ մարզում առաջացած խնդիրներին ժամանակին լուծում տալ՝ հայեցակարգված ձևով, և դրանով նվաճի բնակչության հարգանքը: Արդյունքում` կշահի այն կուսակցությունը, որը ներկայացնում է նա: Մարզպետի ուղղակի դերակատարում ընտրություններում մենք չենք դիտարկել, չենք էլ գնա դրան, որովհետև մենք ուզում ենք հենց դրանից ազատել երկիրը, որ ընտրություններում չկիրառվեն տարբեր վարչական լծակներ: Որ կիրառող լիներ, երևի այլ արդյունքներ կլինեին, ինչպես դա տխուր ավանդույթի միջոցով տեսնում ենք այլ տեղերում»,- ասաց Արմեն Ռուստամյանը:

Միաժամանակ, նա նշեց, որ ՀՅԴ-ն հայտարարել է ՏԻՄ ընտրություններից իրենց դժգոհության մասին: Ռուստամյանի կարծիքով` այս ՏԻՄ ընտրությունները մրցակցային էին, կայացած, կա դրական տենդենց:

«Հիմա մենք քննություն ենք նշանակել` ՏԻՄ ընտրություններում մեր արդյունքները վերլուծելու համար, և այդ պատկերի հետ կապված` կկայացնենք մեր որոշումը, որը կվերաբերի ամեն մեկի ունեցած դերին. հաշվետվություն պետք է ներկայացնեն բոլոր օղակները»,- ասաց նա:

Ռուստամյանի կարծիքով` քաղաքական պայքարում պարտությունը նորմալ երևույթ է, այն կարող է ունենալ դրական արդյունք լուրջ քաղաքական ուժի համար, որովհետև պարտությունը չի թողնում, որ քաղաքական ուժը մեծամտանա, հոխորտացող հայտարարություններ անի, և ստիպում է, որ սխալներիդ նայես բաց աչքով:

«ՀՅԴ-ի համար այս ՏԻՄ ընտրությունները կարևոր էին, այն առաջին հերթին ստուգատես էր` մինչև հաջորդ ԱԺ ընտրություններ: Սակայն ՀՅԴ-ն չի ընդունում մյուս ծայրահեղությունը, թե այս ՏԻՄ ընտրություններն արտացոլելու են հաջորդ` ԱԺ ընտրությունների արդյունքների պատկերը: ՀՅԴ-ն գտնում է, որ ՏԻՄ ընտրություններում իրենց ներկայացվածությունը աճել է, ուստի, այդ համեմատությամբ, ՀՅԴ արդյունքները ձախողում համարել չի կարելի: Ազնիվ, անկեղծ կվերլուծենք արդյունքները և կկայացնենք մեր որոշումները: Ինչ վերաբերում է հրաժարականներին, դա ինքնագլուխ չի արվում, դա ԳՄ-ի որոշումներով է լինելու»,- ասաց Ռուստամյանը: