Քաղաքականության մեջ շատ փորձառու մարդ չեմ, բայց ինչ-որ ստացվեց՝ գեղեցիկ ստացվեց. Լևոն Ալթունյան

ՀՀ առողջապահության նախարարի ժամանակավոր պաշտոնակատար Լևոն Ալթունյանն իրեն քաղաքականության մեջ շատ փորձառու մարդ չի համարում, բայց, ըստ նրա, ինչ-որ ստացվեց՝ շատ գեղեցիկ ստացվեց: Նման կերպ նա արձագանքեց՝ պատասխանելով հարցին, թե իր համար սպասելի՞ էր, որ Սերժ Սարգսյանը հրաժարական կտա:

«Այնուամենայնիվ, ի՞նչը պատճառ հանդիսացավ, որ Սերժ Սարգսյանը հրաժարական տվեց» հարցին էլ Ալթունյանը պատասխանեց, որ իրավիճակը փոխվել էր, և փորձառու քաղաքական գործիչը միշտ ընդունում է այն որոշումը, որն այդ պահին ամենաճիշտն է: «Մարդն իր ուղերձի մեջ հստակ նշել էր պատճառը, այն է՝ որպեսզի ամեն ինչ անցնի անարյուն, համերաշխ և տրամաբանական ուղիով»,- ասաց նա:

Ալթունյանի կարծիքով՝ Փաշինյանն արտահայտեց ժողովրդի ակտիվ մեծամասնության իղձերը:

Մեկ այլ հարցի, թե ինչպե՞ս է պատկերացնում իր ճակատագիրը, քանի որ հնարավոր է՝ այլևս չլինի իր պաշտոնում, Ալթունյանը պատասխանեց՝ ինչպես նախորդ 59 տարիներին՝ երջանիկ երևանցի: «Հազար ու մի բան արել եմ՝ ապահովագրություն, բժշկություն, երևի մի օգտակար բան կհնարեմ»,- ասաց նա: