Պիտակների մասին ոչինչ չեմ լսել. Լևոն Ալթունյան

Այսօր ՀՀ առողջապահության նախարար Լևոն Ալթունյանը, ամփոփելով ընթացիկ տարվա աշխատանքները, խոսեց առողջապահության ոլորտում կոռուպցիոն ռիսկերի մասին: Ըստ նրա` շուտով վերջ է տրվելու ծրարներով գումարներ փոխանցելուն, մեկ տարվա մեջ իրենց կհաջողվի հաղթահարել այդ երևույթը:

Հարցին, թե իր հարցազրույցներից մեկում ասել էր, որ 5 տարուց առողջապահությունն անվճար կլինի, ի՞նչ քայլեր են արվում այդ ուղղությամբ, նախարարը պատասխանեց, թե անվճար ոչինչ չկա: «Ես պետք է ինձ ուղղեմ, եթե ես նման բան եմ ասել: Անվճար ոչ մի բան չկա, ուղղակի կան դեպքեր, երբ վճարում է պետությունը»,- ասաց Ալթունյանը:

Մեկ այլ հարցի, թե որն էր պատճառը, որ նախարարն «արժանացել» է Կարեն Կարապետյանի «ամենաանհաջող կադր» պիտակին, նա պատասխանեց, որ պիտակիների մասին չի մտածում: «Պիտակների մասին չեմ լսել, քանի որ քիչ եմ մտածում իմ շուրջը պտտվող խոսակցությունների վերաբերյալ: Ինչ վերաբերում է Կարեն Կարապետյանի` իմ հանդեպ վերաբերմունքին, ապա ես այն գնահատում եմ կայուն և աշխատանքային»,- նշեց Ալթունյանը: