«Սրան պիտի վառենք». մեկնարկեց Շամիրամի սպանդի գործով դատաքննությունը

Քիչ առաջ Արագածոտնի մարզի ընդհանուր իրավասության առաջին ատյանի դատարանում, դատավոր Սուրեն Մնոյանի նախագահությամբ, մեկնարկեց Շամիրամ գյուղում 4 անձի սպանության գործով դատաքննությունը: Դատարանից Yerkir.am-ի լրագրողը հայտնում է, որ այս պահին ուժեղացված հսկողություն է: Գործով ամբաստանյալ Թելման Քալաշյանին երբ բերեցին դատարան, դահլիճում ներկա` տուժողների հարազատները սկսեցին անիծել ամբաստանյալին, նրան անվանեցին «տեռորիստ»: «Իգիլ, տեռորիստ, սրան պիտի վառենք»,- բղավեցին նրանք:

Համաձայն մեղադրական եզրակացության ՝ Թելման Քալաշյանը 2017-ի օգոստոսի 1-ին Արագածոտնի մարզի Շամիրամ համայնքի գերեզմանատանը կից սգո սրահում, շատերի կյանքի համար վտանգավոր եղանակով, կատարել է չորս անձանց սպանություն: Բացի այդ՝ նա 1999թ. ապօրինի կերպով ձեռք է բերել, պահել հրազեն և ռազմամթերք, 2012թ. դեկտեմբերից մինչև 2014թ. նոյեմբերն ընկած ժամանակահատվածում կատարել է վաշխառություն, որի հետևանքով տուժողներն ընկել են նյութական ծանր կացության մեջ, 2017թ. օգոստոսի 17-ին էլ կատարել է սուտ մատնություն:

Այսպիսով`Քալաշյանին մեղադրանք է առաջադրվել ՀՀ քրեական օրենսգրքի` միաժամանակ 4 հոդվածների հատկանիշներով: Շուրջ 24 օր հետախուզման մեջ գտնվող Քալաշյանը հայտնաբերվել էր 2017 թ. օգոստոսի 25-ին և ներկայացվել վարույթն իրականացնող մարմնին։ Մանրամասներն ու տեսանյութը ավելի ուշ: