Շիրակի մարզը զբոսաշրջային համաշխարհային ճանաչում ունեցող կենտրոն դառնալու ներուժ ունի

ՀՀ Շիրակի մարզպետ Արթուր Խաչատրյանը փետրվարի 2-ին հանդիպել է «Թվային նուռ» («Դիջիթըլ Փոմըգրանեթ») ընկերության հիմնադիր Թոդ Ֆաբաքերի հետ:

Ինչպես տեղեկացնում են մարզպետարանից, հանդիպման ընթացքում ի թիվս այլ ծրագրերի, կողմերն անդրադարձան Շիրակի մարզը զբոսաշրջային հանրաճանաչ կենտրոն դարձնելու գաղափարին: Անդրադարձ է եղել«Դիջիթըլ Փոմըգրանեթ»-ի և «Հայ Մանուկների հիմնադրամի» համագործակցության արդյունքում ծնված Visit Armenia նախագծին, որը դեռևս 2015թ-ին ծրագրավորած Visit Gyumri նախագծի տրամաբանական շարունակությունն է։ Ծրագիրը թվայնացնելու է Հայաստանի ողջ զբոսաշրջային ոլորտը՝ շեշտը դնելով մարզերի եւ գյուղական համայնքներում թաքնված զբոսաշրջային գրավչությունների վրա։ Այս պահին արդեն պատրաստ և հասանելի են Շիրակի եւ Լոռու մարզերը։ Բացի տեխնոլոգիական լուծումներից նախատեսվում են նաև միջոցառումների կազմակերպում, վերնիսաժներ և այլն, որոնք համայնքներն ավելի տեսանելի եւ գրավիչ կդարձնեն զբոսաշրջիկների համար։ 

Շիրակի մարզպետը առանձնակի կարևորեց այս նախաձեռնությունը` հայտնելով պատրաստակամություն աջակցելու հեղինակներին: «Շիրակի մարզի զարգացման ռազմավարության մեջ զբոսաշրջությունը կարևոր տեղ ունի, ես բազմաթիվ անգամ ասել եմ, որ Շիրակի մարզը մեծ ներուժ ունի զբաոսաշրջային կենտրոն դառնալու համար, այստեղ բազմաթիվ վայրեր կան, որոնք կհետաքրքրեն զբոսաշրջիկներին: Ես ողջունում եմ ձեր նախաձեռնությունը ու հավաստիացնում եմ, որ կանենք մեզանից անցած ամեն ինչ ձեզ աջակցելու համար»:

Անդրադառնալով Շիրակի մարզում, մանավորապես, Գյումրիում ծավալած 5 ամյա գործունեություն ընթացքում իրականացրած այլ նախագծերի, Թոդ Ֆաբաքերը Արթուր Խաչատրյանին ներկայացրեց 2017թ-ի ամենախոշոր և ամենեհաջողված նախագծերից մեկին` SONY ATV Score App-ին, որը մշակել են գյումրեցի ծրագրավորողները: Այն SONY ATV-ի (https://www.sonyatv.com/en/services)՝ համաշխարհային հսկայի համար մոբայլ հավելված է, որը մեկ տարվա աշխատանքից հետո այսօր արդեն շուկայում կիրառելի և հաջողված գործիք է դարձել։ 
Հիմնադրված լինելով Գյումրու Տեխնոլոգիական կենտրոնում՝ «Դիջիթըլ Փոմըգրանեթ» ընկերությունը վեբ կայքեր եւ մոբայլ հավելվածներ է մշակում միջազգային շուկայի համար։ Սկսելով աութսորսինգից ընկերությունն արդեն զարգացնում է սեփական պրոդուկտները։