Աղձքը հնարավորությունն ունի դառնալու Հայաստանի լավագույն զբոսաշրջային կենտրոններից մեկը

Մշակութային կառույցների ղեկավարները տարեկեսի հաշվետվություն են ներկայացրել ՀՀ մշակույթի նախարար Արմեն Ամիրյանին:

Պատմամշակութային ժառանգության գիտահետազոտական կենտրոնի հաշվետվությանն ավելի շատ կառուցվածքային ու տեխնիկական հարցեր քննարկվեցին: ՊՈԱԿ-ի տնօրեն Տիգրան Սիմոնյանն ու մյուս աշխատակիցները ներկայացրին տարիների ընթացքում այս ոլորտում կուտակված ու լուծում պահանջող մի շարք խնդիրներ:

Ձեռքբերումներից հնագետ Հակոբ Սիմոնյանն առանձնացրեց Աղձք հնավայրում իրականացված հնագիտական աշխատանքի արդյունքը: «Աղձքում հայտնաբերվել է արձանագիր տապանաքար: Ենթադրվում է, որ մաշտոցյան ամենահին գրություններից է: Բացվել է նաև Հայաստանի ամենահին պալատական կառույցը. 4500 քմ տարածք ընդգրկող մոնումենտալ կառույց: Մեր՝ պահպանված միակ պալատը Դվինի 7-րդ դարի պալատն էր, ինչպես նաև Առուճի պալատը: Իսկ այս դեպքում գնում ենք դեպի 4-5-րդ դարեր: Հայ ճարտարապետության համար սա ցնցող հայտնագործություն է»,-ասաց հնագետը:

Աղձքում պեղումները կշարունակվեն 2018-ին: Նախատեսվում է սկսել նաև թանգարանացման գործընթացը: Հակոբ Սիմոնյանի համոզմամբ, Աղձքը հնարավորությունն ունի դառնալու Հայաստանի լավագույն զբոսաշրջային կենտրոններից մեկը:

«Աշխատեք հնարավորինս շատ համագործակցել միջազգային արշավախամբերի հետ, քանի որ դա նպաստելու է մեր հուշարձանների հանրահռչակմանը: Օգտագործե՛ք այդ հնարավորությունը»,-հորդորել է նախարարը: