Հայաստանում սոցիալական բնույթի մեծ ցնցումներ չեմ կանխատեսում. Աղվան Վարդանյան

Թանկացումներին լավ վերաբերվել անհնար է. խորհրդարանում լրագրողների հետ զրույցում ասաց ՀՅԴ խմբակցության քարտուղար Աղվան Վարդանյանը` անդրադառնալով որոշ ապրանքների գնաճին:

«Խնդիր կա, և այդ խնդիրը կառավարությունը պետք է փորձի կարգավորել: Նախ` թույլ չտալ, որ այն, ինչ Հարկային օրենսգրքով սահմանված է, դրանից ավելի փորձեն տնտեսվարող որոշ սուբյեկտներ օգտվել և լրացուցիչ եկամուտի աղբյուր հայթայթել: Որքան ես տեղյակ եմ, գոնե սեղմված գազի գինն է հիմնականում դժգոհություն առաջացրել, ինչը պայմանավորված է ակցիզային հարկի ավելացմամբ: Որքան ակցիզային հարկն ավելացել է, նույն այդ չափով էլ գազալցակայաններն են ավելացրել: Ես խոսել եմ 1-2 գազալցակայանի տնօրենի հետ, որոնք ճիշտ այդ չափով են ավելացրել ակցիզային հարկը: Պրոբլեմ է, ընդհանուր սոցիալական պրոբլեմ, որը կապված է տնտեսական քաղաքականության հետ»,- ընդգծեց պատգամավորը:

Ըստ Վարդանյանի` խոսքը վերաբերում է նաև ԵԱՏՄ մաքսային օրենսգրքի հետ կապված հարցերին, սակայն բնական է, որ այստեղ կան նաև այլ շերտեր: «Եկամտահարկի պարագայում բոլորը դժգոհում են, որ աշխատավարձերից պահումներն ավելանալու են: Եթե ավելի օբյեկտիվ լինենք, սոցիալական արդարության տեսակետից նայենք, ապա բացարձակ մեծամասնությունը աշխատավարձ են ստանում մինչև 150 հազար դրամի տիրույթում: Այլ խոսք է, իհարկե, թաքնված զբաղվածությունը, սև աշխատավարձերը և այլն, բայց գոնե վիճակագրությունն այդպիսին է: Նոր օրենսգրքով` այդ բացարձակ մեծամասնության պարագայում եկամտահարկը նվազում է, այս մասին ոչ ոք չի խոսում, խոսում են միայն 150 հազարից վերև 2 տոկոսով եկամտահարկը բարձրացնելու մասին»,- ասաց նա:

Վարդանյանը շեշտեց, որ, ըստ վիճակագրության, շատ ավելի մեծ թվով մարդիկ օգտվում են, փոքր թվով մարդիկ են տուժում: «Այստեղ, կրկնում եմ, խնդիր կա, և ամենահիմնականը, որ ես տեսնում եմ, իսկապես սև աշխատավարձերի խնդիրն է: Ես վստահ եմ, որ, իհարկե, պետական հաստատություններում այլ չափանիշներ են գործում, գիտեմ, որ դա այնտեղ անհնար է, բայց մասնավոր հատվածում վստահ եմ, որ մենք ունենք բավական մեծ տոկոս սև աշխատավարձեր, իսկ սա անդրադառնում է մեր բոլոր խնդիրների վրա` և' աղքատության, և' մյուս հարցերի վրա: Այստեղ անելիք կա»,- նշեց նա:

Իսկ թե ինչպե՞ս է պատկերացնում խնդրի լուծումը, պատգամավորը պատասխանեց. «Ընդհանրապես, վերջին 10-15 տարիներին բավական մեծ գործ արվել է այս ուղղությամբ` տեղեկատվական միասնական բազաներ ստեղծելու, փոխկապակցված բոլոր տվյալները ստուգելու` ոչ միայն ծախսերը, այլև եկամուտները: Այստեղ որոշակի առաջընթաց կա, բայց մենք դեռ շատ հեռու ենք ամբողջական պատկերը ունենալուց»:

Հարցին` կառավարությունն այդ խնդիրը չի՞ տեսնում, Վարդանյանը պատասխանեց. «Կառավարությունն էլ է տեսնում, բայց ես կրկնում եմ` տեղեկատվական այդ ամբողջ շտեմարանները ձևավորելու, փոխկապակցելու, նաև օրենսդրորեն խրախուսելու խնդիրներ կան: Օրինակ` որքան ավելի տվյալ հաստատությունների աշխատավարձերը ճիշտ ցույց տան, գուցե այնքան ավելի  նրանց արտոնություններ տրվեն: Լուրջ խնդիրներ կան, որոնք պետք է կարգավորել»:

Այս ամենով հանդերձ, պատգամավորը սոցիալական բունտի նախադրյալներ չի տեսնում: «Ես խորապես համոզված եմ, որ մենք ունենք սոցիալական լուրջ խնդիրներ, և դա ակնհայտ է, բայց դրա լուծման ճանապարհները ևս պարզ են: Սոցիալական բնույթի մեծ ցնցումներ ես Հայաստանում չեմ կանխատեսում, և դա ունի իր բազմաթիվ պատճառները: Մեր անկախ պետականության փորձն է ապացուցել: Ես համոզված եմ, որ Հայաստանում այն ժամանակ են հնարավոր հասարակական լայն խմորումներ, լայն ցնցումներ, երբ ազգային և սոցիալական խնդիրները միատեղվում են, իրար հետ են հանդես գալիս, սա է մղում մեր հասարակության լայն զանգվածներին դժգոհության, բողոքի լուրջ ակցիաների: Առանձին` միայն սոցիալական բնույթի խնդիրները չեն կարող մեծ ազդեցություն ունենալ»,- եզրափակեց Վարդանյանը: