Համոզված չեմ, որ Հայաստանում սոցիալական հողի վրա հնարավոր են ցնցումներ. Աղվան Վարդանյան

Ըստ ԱԺ ՀՅԴ խմբակցության քարտուղար Աղվան Վարդանյանի` ամեն ժողովուրդ իր բնույթն ու տեսակն ունի: ԱԺ ավանդական ճեպազրույցում լրագրողների խնդրանքով անդրադառնալով Ուկրաինայում տեղի ունեցող դեպքերին և Հայաստանում նույն սցենարների հավանականությանը` Վարդանյանը նշեց. «Համոզված չեմ, որ Հայաստանում սոցիալական հողի վրա հնարավոր են ցնցումներ կամ լուրջ պրոցեսներ: Քանի դեռ սոցիալական խնդիրները չեն զուգակցվում ազգային խնդիրների հետ, ցնցումները լավ արդյունք չեն ունենա»:

Ինչ վերաբերում է այն հարցին, թե ինչպիսի՞ հարաբերություններ կձևավորվեն Հայաստանի և Ուկրաինայի նոր իշխանությունների միջև, նա կարծիք հայտնեց, որ երբ Ուկրաինայում քաղաքական իրադրությունը հստակեցվի, այն ժամանակ էլ Հայաստանի իշխանությունները կհայտնեն իրենց դիրքորոշումը և նորմալ հարաբերություններ կհաստատեն Ուկրաինայի հետ: «Հուսով եմ, որ Ուկրաինայում տևական ցնցումից և ողբերգությունից հետո կողմերը կգտնեն լուծումներ: Ռուսաստանն ու Արևմուտքը պետք է լեզու գտնեն, որ Ուկրաինան չտրոհվի»,- ասաց Աղվան Վարդանյանը:

Պատգամավրը նշեց, որ Հայաստանում առկա են բազմաթիվ խնդիրներ, օր օրի հանրության շրջանում դժգոհություններն աճում են, ուստի պետք է կարողանալ ներքին խնդիրները լուծել, այլ ոչ թե արհեստականորեն նոր պրոբլեմներ ստեղծել: «Մեր հարցերը պետք է կարողանանք ինքներս լուծել»,-ասաց նա:

Ինչ վերաբերում է Մաքսային միությանն անդամակցության հեռանկարներին, պատգամավորը կարծիք հայտնեց, որ Հայաստանը Մաքսային միության անդամակցության շրջանակներում առավելություններ կունենա մի դեպքում` եթե բանակցողները կարողանան Հայաստանի համար բացառություններ և առավելություններ ապահովել, հակառակ դեպքում՝ Հայաստանը տուժելու է: «Այնպես որ` այդ բանակցություններից է կախված Մաքսային միության անդամակցության արդյունքը»,- ասաց Աղվան Վարդանյանը:

Լրագրողներից մեկի հարցը, որը սկսվում էր «բանը նրանում է, որ...» ձեւակերպումով, մեղմ ասած, դուր չեկավ Աղվան Վարդանյանին, եւ նա հայտարարեց. «Ոչ թե բանը նրանում է, այլ բանն այն է: Ամեն անգամ, երբ վարչապետը այդպես է ասում, բարկանում եմ: Սա ասում եմ, որ մեզ չմեղադրեք հայերենի չիմացության մեջ»:

Ճեպազրույցի ընթացքում հարց հնչեց նաեւ Հրայր Թովմասյանի եւ նրա հայտնի արտահայտության ու Արմեն Ռուստամյանի պատասխանի մասին: Աղվան Վարդանյանը հայտարարեց, որ թեման ՀՅԴ-ի համար փակված է: