Նոր կոալիցիայի վերաբերյալ ՀՀԿ-ում քննարկումներ չկան. Շարմազանով

ԱԺ փոխնախագահ Էդուարդ Շարմազանովն այսօր ԱԺ-ում, անդրադառնալով մամուլում տեղ գտած այն հրապարակումներին, թե 2018 թվականին հնարավոր է ՀՀԿ-ն կոալիցիոն հուշագիր ստորագրի «Ծառուկյան» դաշինքի հետ, լրագրողներին ասաց, որ ապագայի վերաբերյալ կանխատեսումներ անելն անշնորհակալ գործ է:

Հարցին՝ կա՞ն քննարկումներ հարցի վերաբերյալ,նա պատասխանեց. «2018 թվականի ապագա կոալիցիայի, կառավարության վերաբերյալ որևէ քննարկում ՀՀԿ-ում չի ծավալվել: Մեկ անգամ չէ, որ դրա մասին ասվել է: ՀՀԿ-ն այս պահին իրականացնում է նախագահ Սարգսյանի` մայիսի 18-ի ծրագրային ելույթի դրույթները, որի հիմքի վրա է կառավարությունը»:

Շարմազանովն ընդգծեց, որ ՀՅԴ-ն իր կայուն տեղն ունի կոալիցիայում, իսկ թե  2018 թվականին կոալիցիան ի՞նչ տեսք կունենա, կքննարկեն հաջորդ տարվա ապրիլին:

Անդրադառնալով Սերժ Սարգսյանի այն հայտարարությանը, թե իրենք պատերազմ են հայտարարում անարդարությանը, և պատասխանելով հարցին` մեկնարկը տրվա՞ծ է, ԱԺ փոխնախագահը կարծիք հայտնեց, որ լրագրողները հնարավորություն կունենան լուսաբանելու և տեսնելու, որ ընթացքը տրված է:

Հարցին՝ ովքե՞ր են երկրում անարդարություն սերմանողները, Շարմազանովը պաատսխանեց, որ անարդարությունն անուն- ազգանուն չէ, դա երևույթ է, որի դեմ պետք է պայքարել` անկախ կուսակցական պատկանելությունից եւ զբաղեցրած պաշտոնից: «Յուրաքանչյուրս պետք է սկսենք մեզանից»,- ասաց նա: