Հայաստան-Իրան երկաթգծի հետ կապված քննարկումներ ընթանում են, բայց արդյունքներ չկան. նախարար

Այսօր ԱԺ տնտեսական հարցերի մշտական հանձնաժողովում քննարկվում էր կապի, տրանսպորտի և ՏՏ ոլորտին հատկացված բյուջեի նախագիծը: ԲՀԿ խմբակցության պատգամավոր Միքայել Մելքումյանը հարց ուղղեց  տրանսպորտի, կապի և ՏՏ նախարար Վահան Մարտիրոսյանին, թե ինչպե՞ս են կարողանալու պահել ՏՏ ոլորտի մասնագետներին, որոնք նախընտրում են աշխատել արտասահմանում` բարձր աշխատավարձով:

Նախարարի խոսքով՝ ՏՏ ոլորտը, իհարկե, աճող է, սակայն Հայաստանն ունենում է տարեկան 2 հազար աշխատողի կարիք, և ապագայում սովորական ծրագրավորողներ արդեն քիչ կպատրաստեն, անհրաժեշտ կլինի պատրաստել կոնկրետ մաթեմատիկական խնդիր լուծող ծրագրավորողներ, ինչի համար անհրաժեշտ կլինի զարկ տալ կրթության բնագավառի ֆունդամենտալ գիտությունների ոլորտին:

Իրան-Հայաստան երկաթուղու հնարավոր կյանքի կոչմանն անդրադառնալով` նախարարը նշեց, որ եթե իրանական երկաթուղին Հայաստանով անցներ, դա Իրանի համար շատ ավելի շահավետ կլիներ, այդ ուղղությամբ քննարկումներ գնում են, սակայն արդյունքներ դեռ չկան: