ՀՀԿ-ն առանց կոալիցիայի էլ ունի համապատասխան քանակի ձայն. Մկրտիչ Մինասյան

Խորհրդարանական կառավարման համակարգը մեր երկրին հնարավորություն է տալու ավելի արդյունավետ կառավարում իրականացնել. այսօր լրագրողներին ասաց ՀՀԿ-ական Մկրտիչ Մինասյանը: Նրա խոսքով` քանի որ Հայաստանը կիսանախագահական կառավարում ունի, ժողովուրդը դժգոհում է, որ միայն մեկ անձնավորություն է որոշումներ կայացնողը: «Խորհրդարանական կառավարման համակարգը թույլ է տալիս կոլեգիալ որոշումներ ընդունել»,- ասաց Մինասյանը:

Նա անդրադարձավ նաև կոալիցիոն համակարգին: «ՀՀԿ-ն առանց կոալիցիայի էլ ունի համապատասխան քանակի ձայն: Եթե մարդիկ կոալիցիայից դուրս են գալիս, իրենց գործն է»,- նշեց պատգամավորը:

Ըստ նրա` չափազանց կարևոր է կուսակցությունների դերը: «Նախագահական կառավարման համակարգը մեր երկրում գործել է, և մենք տեսել ենք, որ կան բազմաթիվ բացթողումներ և թերություններ: Յուրաքանչյուր օղակ կունենա իր գործառույթները: Այս պարագայում` ոչ միան կուսակցություններն են ուժեղանալու, այլ նաև ժողովուրդ-իշխանություն կապն է ավելի ամրապնդվելու»,- վստահեցրեց Մինասյանը:

Պատգամավորը հավելեց նաև, որ կուսակցությունները, իրենց շահերից ելնելով, մեծ ցանկություն ունեն իրենց ցուցակներում ընդգրկել որակյալ, քաղաքագիտական առումով կայացած մարդկանց: