Չկան փաստեր` չկան աղանդներ

Կառավարության աշխատակազմի Ազգային փոքրամասնությունների եւ կրոնի հարցերի վարչության պետ Վարդան Ասցատրյանը խուսափեց աղանդների թվաքանակի ավելացման հետ կապված որեւ հայտարարություն անելուց. ոչ հստակ աղբյուրներ կան, ոչ էլ պետական վիճակագրական տվյալներ:

Ավելին,  Վարդան Ասցատրյանը նշեց, որ  մեր իրավական բառապաշարում առհասարակ չկա  «աղանդ» հասկացողությունը:« Այսօր այդ տերմինը շատ է օգտագործվում հանրության, ԶԼՄ-ների կողմից, բայց քանի դեռ փաստեր չեն գրանցվել և ապացույցներ չկան, չենք կարող նրանց մեղադրել աղանդ լինելու մեջ»,-նշեց Վ. Ասցատրյանը` հավելելով, որ աղանդավորական կազմակերպությունը պետք է հասկանալ հետևյալ կերպ.«Այն կրոնական միավորը, որն իր գործունեությամբ հակաօրինկան քայլեր է ձեռնարկում անհատի իրավունքի նկատմամբ, հասարակության, բարոյականության, առողջության նկատմամբ  բնութագրվում է որպես այդպիսին»:

Հարցին, թե ինչո՞ւ է աղանդավորական շարժման գործունեությամբ զբաղվում  ազգային փոքրամասնությունների և կրոնի հարցերի վարչությունը, այլ ոչ թե եկեղեցին Վ. Ասցատրյանը  պատասխանեց, թե սխալ է մտածել, որ  եկեղեցին պասիվ գործունեություն է ծավալում: «Ավելին, եկեղեցին փորձում է զբաղվել խնդրով, բայց կարծում եմ, որ դա դեռ քիչ է խնդրին հանգուցալուծում տալու համար»:

Անդրադառնալով Արդարադատության նախարարության մշակած «Խղճի ազատության եւ կրոնական կազմակերպությունների մասին»  օրինագծին վարչության պետը նշեց, որ նախորդ նախագիծը մշակվել էր կառավարության աշխատակազմում և ուղարկվել էր Վենետիկի հանձնաժողով `փորձագիտական գնահատման, որտեղ էլ  քննադատության էր  արժանացել:«Այնտեղ բավական խիստ քննադատական եզրակացության էին եկել, բայց դա չէր նշանակում, որ պետք է նախագիծը մի կողմ դրվեր, ինչը և արեց նախարարությունը և  մշակելով նոր ծրագիր` սահմանեցին մեղմ դրույթներ հակաօրինական կազմակերպությունների նկատմամբ»,-նշեց վարչության պետը հավելելով, որ իրենք տեղեկատվություն չունեն, այն մասին, թե նոր նախագիծը Վենետիկի հանձնաժողով ուղարկվել է, թե ոչ:

Նա  տեղեկացրեց նաև, որ իրենց կազմակերպությունը դիմել է առողջապահության նախարարություն  տեղեկանալու, թե ինչ տվյալներ ունեն այն մարդկանց մասին, ովքեր առնչվելով աղանդների հետ , ձեռք են բերել հոգեկան անհավասարակշռություն:«Նախարարությունից մեզ հայտնեցին, որ 150 մարդ նման բարդ խնդրի առջև է կանգնել`առնչվելով աղանդների հետ»,- ասաց նա: