ՀՀԿ-ում քննարկումներ կլինեն Սերժ Սարգսյանի` կուսակցության նախագահի պաշտոնից հեռանալու մասին. Վահրամ Բաղդասարյան

ՀՀԿ նիստից հետո խմբակցության ղեկավար Վահրամ Բաղդասարյանը նշեց, որ դիմել են ՀՀ նախագահին, որպեսզի քաղաքական ուժերին քաղաքական երկխոսության հրավիրի։

Հարցին` վարչապետի թեկնածուն ՀՀԿ-ական կլինի՞, նա պատասխանեց. «Երբ այդ քաղաքական երկխոսությունները լինեն, մենք որոշում կկայացնենք, դեռ որոշում չենք կայացրել»:

Վահրամ Բաղդասարյանը չի կարծում, որ ՀՀԿ-ականներ կլինեն, որ կողմ կքվեարկեն Փաշինյանին: «Հանրապետականը միասնական է: Երբ որոշում կայացնենք, դրա մասին կխոսենք»,- ասաց նա։

Անդրադառնալով Փաշինյանի ասած` ժողովրդի թեկնածուին` Բաղդասարյանն ասաց, որ «ժողովրդի թեկնածու» հարաբերական հասկացություն է, իրենք շարժվելու են Սահմանադրությամբ:

Հարցին էլ` արդյո՞ք Սերժ Սարգսյանը նույն դերակատարությունն ունի, նա պատասխանեց, որ Սերժ Սարգսյանը որևէ գործընթացի չի խառնվում և չի էլ ցանկանում այս թեմաներում լինել: «Կա վարչապետի պաշտոնակատար, ով նախագահի հետ որոշումները կայացնում է»,- ընդգծեց Բաղդասարյանը:

Ճշտող հարցին` արդյո՞ք Սերժ Սարգսյանն ամբողջովին մեկուսացել է այս գործընթացներից, նա պատասխանեց. «Այո, իր հրաժարականով նա ամեն ինչ ասաց»:

Անդրադառնալով հարցին` արդյո՞ք հնարավոր է Սերժ Սարգսյանը հրաժարական տա նաև ՀՀԿ նախագահի պաշտոնից, Բաղդասարյանը նշեց, որ նման քննարկումներ կկազմակերպեն, և հաստատեց, որ օրակարգում նման հարց կա: