Փող են բաժանում, իսկ հետո մարդկանց ձեռքերի վրա տանում ընտրության. Նիկոլայ Ծատուրյան

Ընտրությունները կեղծելու ձև միշտ էլ գտնում են, ինչպես այս անգամ եղավ. լրագրողների հետ զրույցում ասաց ռեժիսոր Նիկոլայ  Ծատուրյանը:

Ըստ նրա` կեղծողները մարդկանց փող տալու ձևերը գտնում են, հետո էլ` ձեռքերի վրա տանում ընտրության:

«Գիտեմ, որ լավ էլ փող են բաժանել, բայց ինձ չեն տվել: Եթե ինձ 20 000 դրամ տային, ես էլ իրենց 20 000 կտայի ու կասեի` ինձնից հեռու մնացեք:  Փող տալն իշխանության գործն է, որն իրենց մոտ լավ է ստացվում, բայց` ընտրությունից ընտրություն: Կտեսնեք` ինչ է լինելու` արտագաղթն ավելի է շատանալու, մարդիկ ավելի են հուսահատվելու, էդքան բան»,- ասաց Ծատուրյանը:

Ասուլիսի մեկ այլ բանախոս` գրող, հրապարակախոս Մերուժան Տեր-Գուլանյանը նշեց, որ նման բան չի լինի, ընդհակառակը` գնացածները կսկսեն վերադառնալ, քանի որ երկրում վերջապես մարդիկ ընտրել են իշխանության, որին ուզում են: Ավելին, ըստ Տեր-Գուլանյանի, վերջին տարիներին Հայաստանում մեծ ձեռքբերում ունենք` խոսքի ազատությունը, որը չենք գնահատում: Սակայն Ծատուրյանը նշեց` այո, կա խոսքի ազատություն, ուղղակի մեզ` խոսողներիս, «շան տեղ դնող չկա»:

Ըստ Մերուժան Տեր-Գուլանյանի` շատ հոռետես ենք դարձել, ինչը չի կարելի` ինչ ասես, այդ էլ կլինի: «Լավ է լինելու»,- խոսքն այսպես ավարտեց նա: Ի պատասխան, Նիկոլայ Ծատուրյանը նշեց.«Այո, լավ է լինելու, ուղղակի մենք էդ լավն էդպես էլ չենք տեսնի»: