Շատ ուրա՞խ ենք` մտնում ենք ՄՄ, մի հատ էլ Ղարաբաղը ՌԴ մա՞ս դառնա. Նիկոլայ Ծատուրյան

Շատ ուրա՞խ ենք, որ մենք մտնում ենք Մաքսային միություն, մի հատ էլ Ղարաբաղը ՌԴ մա՞ս դառնա. yerkir.am-ի հետ զրույցում նշեց ՀՀ ժողովրդական արտիստ Նիկոլայ Ծատուրյանն` անդրադառնալով ՌԴ նախագահ Վլադիմիր Պուտինին ուղղված Զորի Բալայանի բաց նամակին:

Ըստ Ծատուրյանի` ինչպե՞ս կարող է Ղարաբաղը ՌԴ մաս դառնալ, եթե այն չի ճանաչվել որպես Հայաստանի մաս, եւ պաշտոնապես համարվում է Ադրբեջանի մաս:

«Ինչպե՞ս կարող է մտնել ՌԴ կազմի մեջ, եթե Ադրբեջանը չի մտնում: Չի լինի դա, անիմաստ բան է, հնարավոր չէ, իրավունք չունեն դա անել: Կարծում եմ` լավ է, որ այդպես էլ մնա Ղարաբաղը, իսկ հետո, երբ պետք լինի, մտնի Եւրոպայի կազմի մեջ»,-ասաց Ծատուրյանը:

Սիրված թատերական գործիչը վերջերս Ղարաբաղում է եղել եւ նշեց, որ փողոցում`ցուցապաստառների վրա, տարբեր լեզուներով ասացվածքներ կային, որոնցից մեկում գրված էր` «Անկախությունն այլընտրանքային չի լինում»:

«Մի քիչ անկախ ենք` չկա նման բան: Ղարաբաղը... լրիվ ուրիշ կարգեր են, մենթալիտետ: Ես ուրիշ երկիր տեսա, որը ոչ մի կապ չունի Հայաստանի հետ, եւ դա երեւի լավ է»,-ասաց Ծատուրյանը:

Հիշեցնենք, որ Բալայանը բաց նամակ է գրել ՌԴ նախագահ Վլադիմիր Պուտինին եւ, ըստ էության, մի շարք փաստարկներ բերել, ըստ որոնց` Ղարաբաղը պատկանում է Ռուսաստանին՝ Գյուլիստանի պայմանագրով: Զորի Բալայանը Պուտինին կոչ է անում այցելել Ղարաբաղ եւ այն ճանաչել որպես Ռուսաստանի մաս: