Ամաչում եմ, որ հայ եմ, երբ Արմենչիկին վաստակավոր արտիստի կոչում են տալիս. Նիկոլայ Ծատուրյան

ՀՀ ժողովրդական արտիստ, պրոֆեսոր Նիկոլայ Ծատուրյանն ամաչում է, որ հայ է, երբ Արմենչիկին վաստակավոր արտիստի կոչում են տալիս: Այսօր նա լրագրողներին ասաց, որ մեր պատգամավորների մեծ մասը Ջմբռլախ գյուղից է, և արվեստում իրական արժեքները չեն տարբերում աղբից: Մեզ մոտ, ըստ Ծատուրյանի, քաղաքակրթությունն է պակասել, արժեքային համակարգն անկում է ապրել, ու հիմա արժեքավոր է համարվում այն, ինչի վրա նախկինում չէիր էլ նայի:

«Բոլորը հիմա մի սկզբունքով են առաջնորդվում` երբ մարդուն ինչ-որ բանի մասին կարծիք ես հարցնում, ասում են` «լավն ա, ոչինչ», ու սա դարձել է չափանիշ: Մի լավ խոսք կա` լավ արվեստը թևեր է տալիս, վատը` սմբակներ: Հիմա մեզ մոտ սկբակները շատ-շատ են»,- ասաց նա:

Ծատուրյանը նշեց նաև, որ չի սիրում պաթոսը, սակայն սերիալների նկատմամբ իր դիրքորոշումը հստակ է` սերիալը փող աշխատելու միջոց է, ու, ըստ նրա, թող վերամբարձ չթվա իր կարծիքը, քանի որ իրականությունից չենք փախչի: «Ընկերներիցս մեկը լավ բնորոշեց սերիալային իրարանցումը` ասելով. «Է, թող նկարեն, որ դերասանները փող աշխատեն, բայց հետո այն ցույց չպետք է տան»: Բայց եթե արվեստը դարձավ միայն փող աշխատելու միջոց, այն կվերանա»,- ասաց նա: