Ընտրելով անձին` ընտրում են տվյալ քաղաքական ուժին. Արծվիկ Մինասյան

Այսօր` կառավարության նիստից հետո, բնապահպանության նախարար Արծվիկ Մինասյանն անդրադարձավ նախընտրական քարոզարշավին: Հարցին, թե շարունակո՞ւմ են կողմ լինել ռեյտինգային քվեարկությանը` այն դեպքում, երբ այն բազմաթիվ խնդիրներ է պարունակում, նախարարը պատասխանեց. «Հնարավոր է, որ ընթացքում առաջանան որոշ խնդիրներ տարածքային ցուցակների` անձնավորված լինելու հետ կապված, սակայն պետք է բացատրել, որ, ընտրելով անձին, ընտրում են այն քաղաքական ուժին, որը պետք է ներկայացված լինի խորհրդարանում»:

Ինչ վերաբերում է ընտրողի նկատմամբ ճնշումներին, ապա, ըստ Արծվիկ Մինասյանի, ով էլ այն իրականացնի` իշխանություն, թե` ընդդիմություն, դա բացասական երևույթ է, և պետք է դեմ արտահայտվել նման երևույթներին, բերել այն վիճակին, որ ընտրողի կամքը լիարժեք արտահայտող պատկեր առաջանա:

Այլ ներքաղաքական հարցերի նախարարը չցանկացավ պատասխանել` ասելով, որ կառավարության շենքի ներսում է գտնվում, և ճիշտն այն է, որ երկուշաբթի օրվանից սկսի պատասխանել այդ հարցերին` գտնվելով արձակուրդում: