Չէ հա, ինձանից ի՞նչ ընդդիմադիր. ՀՀԿ-ական պատգամավոր

ԱԺ ՀՀԿ խմբակցության պատգամավոր Հայկ Գրիգորյանը ընդգրկված չէ որևէ նախընտրական ցուցակում: Հիշեցնենք` Հայկ Գրիգորյանը ԱԺ պատգամավոր է ընտրվել թիվ 37 ընտրատարածքից, որն ընդգրկում է Գորիսն ու Սիսիանը: Պատգամավորը վայելում էր Սյունիքի նախկին մարզպետ Սուրիկ Խաչատրյանի հովանավորությունը:

Այսօր լրագրողների հետ զրույցում, պատասխանելով այն հարցին, թե ինչո՞ւ այս անգամ չընդգրկվեց ՀՀԿ ցուցակում, Հայկ Գրիգորյանը պատասխանեց. «Չգիտեմ, չեմ կարող ասել, երևի այդպես նպատակահարմար գտավ կուսակցությունը»:

«Իսկ գուցե ակտի՞վ չի եղել, այդ պատճառով» հարցադրմանը արձագանքեց. «Գուցե նաև այդպես»:

Գուցե Սուրիկ Խաչատրյանի մերձավորը լինելու հանգամա՞նքն է ցուցակում չընդգրկվելու պատճառը: «Ես հիմա էլ եմ Սուրիկ Խաչատրյանի թիմակիցը, մենք ընկերներ են, լավ բարեկամներ»,- պատասխանեց երիտասարդ պատգամավորը:

Նա չհամաձայնեց լրագրողների այն դիտարկմանը, որ իր` պատգամավոր դառնալու գործում որոշիչ է եղել Սուրիկ Խաչատրյանի գործոնը: Հայկ Գրիգորյանը վստահ է, որ բնակիչներն են իրեն ընտրել:

Հարցին` հնարավո՞ր է ընդդիմադիր դառնա,` նեղանալով ՀՀԿ-ից, անկեղծորեն պատասխանեց. «Չէ հա, ինձանից ի՞նչ ընդդիմադիր, ես ինձ ընդդիմադիր դաշտում չեմ էլ պատկերացնում: Իհարկե, եթե ՀՀԿ-ն չդառնա ընդդիմություն»:

Ապագայի ծրագրեր պատգամավորն ունի, սակայն չցանկացավ դրանց մասին խոսել: