Ի՞նչ է նշանակում` ընդդիմադիր կեցվածք ընդունել, եթե մենք ընդդիմադիր դաշտում ենք. «Ծառուկյան» խմբակցության պատգամավոր

«Ծառուկյան» խմբակցության պատգամավոր Վարդևան Գրիգորյանն այսօր խորհրդարանում լրագրողներին ասաց, որ դեռ բյուջեի վերաբերյալ քննարկումներ չեն եղել իրենց խմբակցությունում, սակայն ավելի շատ հակված են դեմ խոսել:

«Եթե նման սոցիալական վիճակում ենք, ո՞նց կարող ենք ավելի շատ «կողմ»-ի հակված լինել: Բյուջեում չի նախատեսվում սոցիալական որևէ փոփոխություն, և այն վիճակը, որն ունի ժողովուրդը, չեմ կարծում որոշակի բարելավումներ կան, դա իմ անձնական կարծքին է»,- ասաց նա:

Նշենք, որ մամուլում տեղեկություն էր հայտնվել, որ Գագիկ Ծառուկյանը հրահանգել է իր խմբակցության անդամներին` ավելի ընդդիմադիր կեցվածք ընդունել բյուջեի քննարկումների ժամանակ: Սրան ի պատասխան` Գրիգորյանն ասաց, որ դրանք ասեկոսեներ են: «Չկա նման բան, այդպիսի քննարկում չի եղել մեր խմբակցությունում: Պարոն Ծառուկյանն այդպիսի հանձնարարական չի տվել: Դա ուղղակի ասեկոսեներ են: Պարոն Ծառուկայնը միշտ քննարկման ու կոլեգիալ որոշումներ կայացնելու կողմնակից է եղել»,- ասաց պատգամավորը:

Ապա Գրիգորյանը վրդովվեց «ընդդիմադիր կեցվածք» արտահայտությունից: «Ի՞նչ է նշանակում` ընդդիմադիր կեցվածք ընդունել, եթե մեր խմբակցությունն ընդդիմադիր դաշտում է գործում: Դա նշանակում է, որ ձևական կարող ես լինել ընդդիմադիր, հետո երբ պետք չէ, չլինես: Ես շատ լավ հասկանում եմ ձեր տողատակում ինչ է, բայց չկա նման բան, նորից եմ կրկնում` պարոն Ծառուկյանը միշտ կողմնակից է եղել քննարկումների, կոլեգիալ որոշում ընդունելուն, երբևիցե նման հանձնարարություն որևէ մեկին չի եղել»,- ասաց նա:

Դիտարկմանն էլ` եթե լինի հանձնարարություն, «գրոհելո՞ւ են» բյուջեի քննարկումների ժամանակ, Գրիգորյանն արձագանքեց. «Ի՞նչ է նշանակում` գրոհել: Մենք միշտ ասել ենք, որ ինքնանպատակ որևէ գործառույթ չենք իրականացրել: Այն նախագծերին, որոնք շոշափում են մեր ազգաբնակչության շահերը` դրական առումով, մենք միշտ կողմ ենք քվեարկել, իսկ այն օրինագծերին, որոնք մեր ժողովրդի սոցիալական իրավիճակի հետ են կապված, ժողովրդի շահերին դեմ են, իհարկե, մենք դեմ ենք քվեարկում»:

Գրիգորյանը նաև չհամաձայնեց, թե Գագիկ Ծառուկյանն իր խմբակցության որոշ պատգամավորների, մասնավորպես` Վարդան Ղուկասյանին արգելել է հարցազրույցներ տալ կամ առհասարակ խոսել: «Նման ինֆորմացիայի ես չեմ տիրապետում, բայց էլի եմ ասում` գիտենալով Ծառուկյան տեսակին, մարդուն, Ծառուկյանը երբեք իրեն թույլ չի տվել մեկին հրահանգի` շատ խոսիր կամ քիչ խոսիր: Առավել ևս` ԱԺ պատգամավորին, որը կրթական մակարդակով բարձր է»,- ասաց Գրիգորյանը, ապա հավելեց, որ լրագրողներն իրեն ասեկոսեներից հարցեր չտան: