Չգիտեմ՝ կա՞մ, թե՞ չկամ ցուցակում. Լյովա Խաչատրյան

«Ծառուկյան» դաշինքի ո’չ համամասնական, ո’չ ռեյտինգային ցուցակները դեռևս հայտնի չեն հանրության, նույնիսկ իրենք` ԲՀԿ-ականները, տեղյակ չեն` ցուցակում կա՞ն, թե՞ ոչ:

Yerkir.am-ի հետ զրույցում ԲՀԿ խմբակցության պատգամավոր Լյովա Խաչատրյանն ասաց, որ իր` համամասնական ցուցակում ընդգրկվելու մասին տեղյակ չէ: «Տեղյակ չեմ, հավանաբար` կամ ցուցակում»,- ասաց նա:

Այդուհանդերձ, Խաչատրյանը նշեց, որ չի կարծում, թե հատուկ են մինչև վերջին վայրկյանը թաքցնում ցուցակները, որպեսզի թիմակիցները ժամանակից շուտ չնեղանան: «Նման խնդիր չկա, ընտրական օրենսգիրքն այնպիսին է, որ ամեն մեկն իր ցույց տված արդյունքներին համապատասխան է գնահատվելու` անկախ ցուցակում տեղից»,- ասաց նա:

Խաչատրյանը նշեց, որ չգիտի` ցուցակները չհրապարակելը գաղտնիությո՞ւն է, թե՞ մարտավարություն: «Ինչ վերաբերում է ցուցակը չհրապարակելուն, ես չգիտեմ` դա գաղտնիությո՞ւն է, թե՞ մարտավարություն: Հավանաբար, կուսակցության ղեկավարն է այդպես որոշել, ինչը ինձ շատ քիչ է հետաքրքրում»,- ասաց նա:

Մեր դիտարկմանը` Դուք էլ վստահ չեք և նշեցիք, թե, հավանաբար, կաք ցուցակում, Խաչատրյանը պատասխանեց. «Դե ես ռեյտինգայինով առաջադրված եմ: Ցուցակում կլինեմ, չեմ լինի` ինձ, անկեղծ ասած, չի էլ հետաքրքրում: Եթե ժողովուրդն ինձ ձայն տվեց, կընտրվեմ, չտվեց, չեմ ընտրվի, այնպես որ` այդ համամասնական ցուցակը ինձ չի հետաքրքրում»:

Հիշեցնենք` երեկ Yerkir.am-ի հետ զրույցում Գագիկ Ծառուկյանի մամուլի խոսնակ Իվետա Տոնոյանը հայտնել էր, որ ցուցակները կհրապարակի ԿԸՀ-ն` սահմանված ժամկետում, այսինքն` փետրվարի 26-ին, իսկ մինչ այդ իրենք նպատակահարմար չեն գտել հրապարակել: