Ես բավարարվելու խնդիր չունեմ, ես կարող եմ կառավարության մի շարք անդամների բավարարել. Լյովա Խաչատրյան

Երեկվա խորհրդարանական լսումներն ուշագրավ էին ոչ միայն ՀՀ էներգետիկայի նախարար Արմեն Մովսիսյանի` գազի գնի վերաբերյալ հայտարարություններով, այլ նաև նրան ուղղված` ԲՀԿ-ական պատգամավոր Լյովա Խաչատրյանի հարցով: Հիշեցնենք, որ պատգամավորի հարցը վերաբերում էր գազի որակին, և իր հարցն ավելի ընկալելի դարձնելու համար, նա բերեց հետևյալ համեմատությունը. «Սովետի ժամանակ քնից վեր էին կենում, սուրճը դնում էին կրակին, խմում, հետո իջնում գոմ, կերակրում անասուններին, հետո գնում էին կոլխոզ` աշխատելու: Հիմա սուրճը դնում են գազին, գնում են անասուններին կերակրում են, գալիս են տուն կնոջը երկու անգամ սիրում են, այդ ընթացքում սուրճը նոր հասցնում է եռալ»: Իսկ նախարար Արմեն Մովսիսյանը նույն ոճով բացատրել էր, որ հիմա արդեն շատ արագ են կնոջը սիրում, պետք է խորհուրդ տալ մի քիչ դանդաղ սիրել:

Yerkir.am-ը փորձեց  Լյովա Խաչատրյանից պարզել` բավարարե՞լ է արդյոք նախարարի պատասխանը: Պատգամավորը հայտարարեց. «Այդ պատասխանը պետք է կանանց բավարարեր: Ես բավարարվելու խնդիր չունեմ: Ասեմ ավելին` ես կարող եմ կառավարության մի շարք անդամների բավարարել»: Մեր ճշտող հարցին` նկատի ունեք կառավարության իգակա՞ն սեռի ներկայացուցիչներին, պատգամավորը պատասխանեց. «Ոչ, եվրոպական սեռի ներկայացուցիչներին»: