«Ժառանգություն» չկա, ՕԵԿ-ը չի էլ եղել, ՀԱԿ-ն էլ թուլացած է. քաղտեխնոլոգը մտահոգ է ընդդիմության համար

Այս օրերին ընտրություններին մասնակցելու համար դաշինքներ են ձևավորվում մի պարզ պատճառով) առանձին մասնակցելու շանս որևէ քաղաքական ուժ չունի, բացի ՀՀԿ-ից. լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը` խոսելով ներքաղաքական զարգացումների մասին:

Նրա խոսքով` Հայաստանում երկու մարդ քաղաքական վարկանիշ ունի` վարչապետ Կարեն Կարապետյանն ու Գագիկ Ծառուկյանը, ընտրություններում շանսեր ունեն ֆինանսական ու վարչական լուրջ ռեսուրսներ ունեցողները: Քաղտեխնոլորգը միաժամանակ հավելեց, որ Գագիկ Ծառուկյանը քաղաքականությունից դուրս գալուց  հետո լուրջ ընտրազանգված կորցրեց:

Ըստ նրա` ընտրություններին ընդառաջ, երկու բևեռ այդպես էլ չի ձևավորվի, որովհետև պառլամենտական ընտրություններին բնորոշ չէ սև-սպիտակ բաժանումը, նաև` ամեն ինչ կորցնելը, ինչպես լինում էր նախագահական ընտրությունների ժամանակ:

Ինչ վերաբերում է ռեյտինգային ընտրությանը, ապա, Կարեն Քոչարյանի խոսքով, այն Հայաստանում վերածվելու է ֆեոդալների պայքարի:

Քաղտեխնոլոգը կարծում է, որ հետընտրական զարգացումներ չեն լինի, որովհետև Գագիկ Ծառուկյանի վերադարձով կվերահսկվի այն հատվածը, որը ձգտում էր փողոց դուրս գալ:

Ինչ վերաբերում է իրենց ընդդիմադիր հայտարարած խորհրդարանական ուժերին, ապա, Կարեն Քոչարյանի խոսքով, «Ժառանգություն»-ը, որպես այդպիսին, էլ գոյություն չունի: ՕԵԿ-ը, նրա խոսքով, երբեք չի եղել, չկա ու չի էլ լինի ընդդիմություն: ՀԱԿ-ը ներկա պահին թուլացած է, եթե համեմատենք նախորդ տարիների նրա հեղինակության հետ: