ԼՀԿ-ի՝ հաջորդ ԱԺ մտնելը կասկածելի է. քաղտեխնոլոգը «Իմ քայլը»-ի հետ երկրորդ նույնականացումն է նկատում

«Լուսավոր Հայաստանը» երկրորդ անգամ նույնականացվում է իշխող կուսակցության հետ՝ կողմ քվեարկելով Սահմանադրական դատարանի ղեկավար Հրայր Թովմասյանի լիազորությունները վաղաժամկետ դադարեցնելու մասին «Իմ քայլը»-ի նախագծին՝ Yerkir.am-ի հետ զրույցում այս տեսակետը հայտնեց քաղտեխնոլոգ Արմեն Բադալյանը՝ անդրադառնալով կարծիքներին, որ ԼՀԿ-ն այս քայլով կորցնում է ընդդիմության դիմագիծը և իշխանության կցորդ դառնում:

«Այսինքն՝ ԼՀԿ-ն ոչ միայն այլընտրանք չդարձավ իշխող խմբակցությանը, այլև այս կերպ օգնեց իշխանության ղեկավարին անձնիշխան համակարգ հաստատելու հարցում»,- ասաց նա:

«Լուսավոր Հայաստան»-ից հակադարձում են՝  կողմ քվեարկելու են հարցի միայն իրավակազմակերպական գործընթացին: Yerkir.am-ին ԼՀԿ պատգամավոր Անի Սամսոնյանն ասաց՝ կողմ են, որ ՍԴ-ն քննարկի Հրայր Թովմասյանի լիազորությունները դադարեցնելու հարցը,  իսկ թե ի՞նչ կորոշի խմբակցությունը, իրավասու չէ որևէ բան անել:

«Այս գործընթացն ունի 2 մաս՝  իրավակազմակերպական և բովանդակային: Քանի որ  «Իմ քայլը»-ի և, ընդհանրապես, իշխանության մոտեցումը դատական համակարգին բացառապես եղել է քաղաքական և ընկալվել որպես քաղաքական ճնշում,  հիմա  նրանք որոշել են  օգտվել իրավական ճանապարհից՝ «Ազգային ժողովի կանոնակարգ» սահմանադրական օրենքի 109-րդ հոդվածով:  ՍԴ նախագահի վերաբերյալ կարգապահական էական խախտումների առերևույթ հիմքեր տեսնելով՝  իշխող խմբակցությունը նախաձեռնել է դադարեցնել նրա լիազորությունները:  Մենք էլ ասում ենք՝ եթե նկատում եք առերևույթ խախտումներ, եկեք դիմենք ՍԴ»,- ասաց ԼՀԿ պատգամավորը:

Խորհրդարանի մյուս ընդդիմադիր խմբակցության՝  «Բարգավաճ Հայաստանի» պատգամավոր Արման Աբովյանը Yerkir.am-ի հետ զրույցում նախընտրեց նախագծին կողմ և դեմ քվեարկելու խնդիրն առայժմ չբարձրացնել, մի կողմ թողնել էմոցիոնալ ֆոնն ու հարցին զուտ իրավական տեսանկյունից մոտենալ:  

«2017 թվականին ԲՀԿ-ն Հրայր Թովմասյանի թիկնածությանը դեմ էր քվեարկել: Խնդիրը պետք է տարանջատել անձերից և հասկանալ միայն մի բան՝  սա իրավական փաստաթուղթ  է, որն իրավաբանորեն պետք է անթերի լինի»,- ասաց Աբովյանը և հավելեց՝  հարցը կքննարկեն ու դիրքորոշում կհայտնեն:

«Ընդդիմությունը միայն քաղաքական կարգավիճակ չէ, այն պետք է ներկայացնի Հայաստանի զարգացման իր տեսլականը, որը պետք է տարբերվի իշխող քաղաքական ուժի տարբերակից»,- ընդգծեց քաղտեխնոլոգ Արմեն Բադալյանը:

Նա վստահ է, որ այս հարցում ԱԺ ընդդիմադիր կուսակցությունները  «Իմ քայլը»-ին այլընտրանք չեն:

Բադալյանը ուշադրություն հրավիրեց հանգամանքին, որ շատ դեպքերում ԼՀԿ-ի գործողությունները, չնայած որոշ քննադատություններին, համընկնում են իշխանության ցանկություններին: «Մասնավորապես՝  վարչապետի շահերից էր բխում ԼՀԿ-ի այն նախագիծը, որով ոստիկանությունը և ԱԱԾ-ն կարող են ղեկավարվել քաղաքական ուժի կողմից  և ԱԺ-ին հաշվետու մարմին չլինել»,- ասաց նա:

Բադալյանը չբացառեց, որ հնարավոր արտահերթ խորհրդարանական ընտրություններում նման քայլերի հետևանքով ԼՀԿ-ի՝ խորհրդարան մտնելը խիստ կասկածելի դառնա:

«Դեկտեմբերի 9-ին հեղափոխության ֆոնով ձևավորված խորհրդարանի էյֆորիան ամբողջովին անցել է: Նոր ընտրությունների ժամանակ հնարավոր է՝  ուժերի նոր կոնֆիգուրացիա լինի»,- ասաց Արմեն Բադալյանը: