Այդ կնոջ խոսքը որպես քաղաքական տեխնոլոգիա չի կիրառվել. Միհրան Պողոսյանի քաղտեխնոլոգը՝ զոհվածի մորը քարոզարշավին մասնակից դարձնելու մասին

ԲՀԿ նախագահ Գագիկ Ծառուկյանի  նախկին խոսնակ, «Ծառուկյան» դաշինքին սատարող «Միասնություն» շարժման անդամ Խաչիկ Գալստյանը նաև ՀՀԿ-ական ռեյտինգային թեկնածու Միհրան Պողոսյանի թիմի հետ է համագործակցում` որպես քաղտեխնոլոգ: Այս մասին նա հաստատեց Yerkir.am-ի հետ զրույցում:  

Նշենք, որ երեկ Քանաքեռ-Զեյթուն համայնքում Միհրան Պողոսյանը քարոզարշավ էր իրականացրել, որի մի դրվագը խիստ բացասաբար է ընկալվել հանրության կողմից: Խոսքն այն մասին է, որ քարոզարշավի ժամանակ հարթակից ելույթ է ունեցել ապրիլյան պատերազմում զոհված զինվորի մայր, ով շնորհակալություն է հայտնել Միհրան Պողոսյանին ցուցաբերած օգնության համար:

Հարցին, թե ինչո՞ւ որոշվեց զոհվածի մորը ամբիոն տրամադրել, որ նա շնորհակալություն հայտնի Միհրան Պողոսյանին, Խաչիկ Գալստյանը պատասխանեց. «Ես ձեզ հավաստիացնում եմ, որ դա հատուկ նպատակով չի արվել: Ոչ ոք չգիտի` ով որ պահին ինչ պետք է խոսի: Նման հանդիպումների ժամանակ որևէ` նախապես նախապատրաստված բան չի լինում: Ժողովրդի հետ հանդիպումներում մարդիկ ցանկություն են հայտնում խոսել, հարցեր բարձրացնել, մարդիկ ազատ են` իրենց կարծիքն արտահայտելու»:

Այն հարցին, թե, որպես մարդ, այլ ոչ` որպես քաղտեխնոլոգ, զոհվածի մոր խոսքը ներքին առարկություն չի՞ առաջացրել, Խաչիկ Գալստյանը պատասխանեց. «Այդ մարդկանց ցավը բոլորս ենք կիսում: Բայց հավատացեք` այդ կնոջ խոսքը որպես քաղաքական տեխնոլոգիա չի կիրառվել: Այդ կինը համայնքի բնակիչ է և ցանկացել է իր խոսքը հղել: Մարդիկ են, ովքեր ամենօրյա ուշադրություն են զգացել իրենց ցավի հանդեպ: Ես համաձայն չեմ, որ ժողովուրդը բացասական է ընկալել այդ փաստը»:

Հարցին թե որքանո՞վ է ճիշտ, քաղտեխնոլոգիաների տեսանկյունից, երբ թեկնածուն գովում է ինքն իրեն, երբ ելույթ ունեցողները գովում են թեկնածուին, բայց նա չի ասում, թե ինչ է անելու, երբ պատգամավոր դառնա, մեր զրուցակիցը պատասխանեց. «Միհրան Պողոսյանն ունենում է բակային հանդիպումներ, ակտիվ քարոզարշավ է իրականացնում և տարբեր տեղերում իր ընտրողներին ներկայացնում է իր ծրագրերն ու անելիքները: Իսկ հանրահավաքում ասվեց անելիքների մի մասի մասին միայն: Նա ունի լուրջ ծրագրեր, անելիքներ»: