Կա «Ժառանգություն»-ը, ՀՅԴ-ն, «Օրինաց երկիր»-ը. Թեւան Պողոսյանը՝ ՀԱԿ-ի «միայնակության» մասին

ԱԺ «Ժառանգություն» խմբակցության պատգամավոր Թևան Պողոսյանը Yerkir.am-ի հետ զրույցում հայտարարեց, որ ինքն ամենեւին էլ համակարծիք չէ առաջին նախագահ Լեւոն Տեր-Պետրոսյանի երեկվա հայտարարությանը, թե ՀԱԿ-ը ընդդիմության դաշտում միայնակ է մնացել:

«Օրինակ` ես այն ջղաձգվողներից մեկն եմ, ով միշտ էլ կողմնակից է լինելու եվրոպական տեսլականին, բայց դա չի նշանակում, որ պետք չէ լսել կամ իմանալ այլ կարծիքներ»,- ասաց Պողոսյանը:

Նա նշեց, որ շատ կարևոր է սեփական տեսլականով առաջնորդվել կարողանալը: «Տեր-Պետրոսյանի կարծիքն է այն, որ ՀԱԿ-ն ընդդիմության դաշտում միայնակ է: Ինքն իրավունք ունի իր կարծիքն ունենալ, բայց այդ դաշտում կան ուժեր, որոնք գործում են, որոնք իրենց տեսլականներն ունեն, որոնք իրենց այլընտրանքներն են ներկայացնում, և այդ պարագայում ես երբևէ չէի ասի, որ ընդդիմադիր դաշտում գոյություն ունի միայն ՀԱԿ-ը»,- նշեց պատգամավորը:

Նա թվարկեց այն քաղաքական ուժերը, որոնք, իր կարծիքով, ընդդիմադիր դաշտում կշիռ ունեն. «Կա «Ժառանգություն»-ը, կա տարբեր մոտեցումներով ՀՅԴ-ն, գործում է «Օրինաց երկիր»-ը, կան շատ արտախորհրդարանական ուժեր: Այնպես որ` չէի ասի, որ միայն ՀԱԿ-ն է»: